Carlos Tevez-a te an tlawm nghal

Khawvela footballer hlawh hnem ber ni tura Chi­nese Super League pantu Carlos Tevez-a'n a club thar Shanghai Shenhua tana a match hmasa berah hnehna a chang zo lo a, Nilaini zan khan AFC Cham­pions League playoff-ah Brisbane Roar chu 2-0 in an ngam lo. Manchester United leh Juventus striker hlui hian Asian Champions League-ah a hmel a lan thei dawn lo tihna a ni.

Hongkou Stadium, Shanghai khawpuia inkhelah hian A League club Brisbane Roar tan Brandon Borello leh Tommy Oar ten first half-ah goal hnih an khung a, la in fit tawk lo Tevez-a'n second half-ah chhanletna remchang nei mah se goalkeeper Jamie Young chuan Argentine striker goal shot hi post-ah a nam per a, Newcastle United striker hlui Obafemi Martins chuan chance tam a hlah bawk.

Sunderland boss hlui Gus Poyet enkawlna hnuaia khel Shanghai Shenhua hi Chinese Super League club zinga AFC Champions League playoff paltlang zo lo hmasa ber an ni a, kar khata £615,000 hlawhtu Tevez tan bul ṭan dan duhawm lo a ni.