AFC Cup ; Colombo hnehtu Bagan an tlang

Mohun Bagan-in I League lama an khelh ṭhat AFC Cup lamah pawh an chhawm nung zel a, Nilaini zan khan an mi­khual Colombo FC chu 2-1 a hnehin AFC Cup playoff khel turin an inpet tling. Kolkata club tan Sony Norde leh Darryl Duffy ten goal khat ve ve an khung a, Sri Lankan club tan Momas Yapo chuan goal khat khung ve mah se awmzia a nei thui lo.

Preliminary round first leg Sri Lanka-a khelh a nih ṭumin Mohun Bagan hian 2-1 in hnehna an chang tawh a, inkhel pahnih belhkhawmah 4-2 in a tlang zawkah an ṭang a, Federation Cup champion hian AFC Cup group stage a Bengaluru zawm turin playoff chiah an hmabak ta.

Inkhel chu

Mohun Bagan coach Sanjoy Sen-a'n February 12 zana East Bengal nen Kolkata Derby an khelh tur mitthla chungin Debjit Majumder, Pritam Kotal leh Sehnaj Singh te a chawlh hahdamtir a, tlarhma lamah erawh him chiangsa an ni bik lo tih hriain a neih ṭhat ber Sony Norde, Katsumi Yusa, Darryl Duffy leh Jeje Lalpekhlua te first eleven a chantir vek.

Sanjoy Sen-a'n minute 28-na lekah a mamawh chhanna a hmu nghal a, Norde chuan Katsumi leh Duffy te nen ball an inpek kual hnuah hmahruaina goal a khung. Haiti international hian second half-ah Duffy tan hun ṭha a siamsak ve thung a, Scottish striker hian a ball hmuh ṭha tak chu goal a chantir turin harsatna a nei lo.

Minute 76-naah Jeje leh Afeel Mohamed ten ball an inchuh­na lamah Sri Lankan defender hian a kutin ball a khawih fuh a, Norde thlaktu Balwant Singh-a'n petin goal-ah a chantir thei lo. Hun tawp nan minute hnih chiah a awm tawh tihin Momas Yapo-a'n Sri Lanka club tan khung ve mah se Colombo club harh a tlai a, goal dang khungna hun a awm tawh loh avangin 2-1 in an tlawm.

Colombo hian an foreign player pathum Ivorian Seka Jean 'Momas' Yapo, Nigerian duo Nasiru Opeyemi leh Afeez Olayemi Olofin-te chu visa fel thei lo avangin an chhawr thei lo hman ṭep a, mah se Indian High Commission lamin tlai khawhnuah pe lehin an inkhelh hma darkar khatah India an thleng ve chauh.

Hmabak

Mizo tlangval Jeje Lalpek­hlua khelhna club hian group stage thleng turin club pakhat an hmachhawn a la ngai a, playoff first leg khel turin February 21 khian Club Valencia khelmual an pan ang. Maldives club hian February 28-ah second leg khel turin India an pan ve leh thung dawn a ni. Valencia hian playoff lut turin Thimphu City chu 3-0 ngawtin an sawp a, an chhe lo ang.