Wolff-a'n Mercedes driver ringtawk

Mercedes boss Toto Wolff chuan season thara a driver tur pahnih Lewis Hamilton leh Valtteri Bottas te chuan hatsatna leh buaina awm loa intlansiak an hmachhawn dun theih a beisei thu a sawi chhuak.

World champion Nico Rosberg a chawlh hnuah a hmunruak luah turin Bottas lakluh a ni a, German driver Rosberg kha khawvela a ṭha berte zinga mi a nih miau avangin amah thlaktu tan pawh mawhphurhna a sang dawn.

Wolff chuan, "An pahnihna an che dun vel ka hmuh tawh chinah chuan an inzah tawn em em a, hun rei lote chhungin Valtteri pawh hian kan kalphung a rawn hre nghal mai. Anni pahnih hian buaina nei loin world champion min nih pui leh theih ngei ka beisei," tiin a sawi.

Formula 1 season thar hi March thla aṭanga tlan ṭan tur a ni a, a hmasa ber atan Australian Grand Prix an tlan ang.