Aizawl FC-in Goan club an ngam

I League season liam taah Aizawl FC-in an mual RG Stadium, Mualpuiah Goan club Sporting Goa leh Salgaocar an hneh lo. Niminah erawh Mizo club-in Churchill Brothers chu 3-1 in a hneh a, Aizawl FC-in Goan club laka an record duhawm lo tak an thai reh.

Penalty pahnih
Mikhual team Churchill hian Liberian forward Ghanefo Kromah penalty hmangin minute 33-naah hma an hruai a, Aizawl FC-in penalty hmang thoin an sut - Mohun Bagan laka penalty chawitu Lalramchullova'n minute 62-naah penalty a khung.

Churchill coach Alfred J. Fernandes chuan, "AFC defender (Zotea) khan a hnung aṭangin Wolfe kha a tackle a, penalty a ni. Penalty kan chawi ve chiah khan inkhel a danglam a, referee khan thutlukna a siam lo. A hmu chiang lo zawk assistant referee-in thutlukna a siam," tiin referee thutluknaa a lungawi loh thu a sawi. AFC coach Khalid Jamil erawhin penalty thutlukna chungchang a sawi zui duh lo.

AFC chakna Kamo!
Aizawl FC-in first half-a goal an phur hnuin second half-ah Mahmoud Al Amna an luhtir a, Syrian midfielder hi danglamna ni mah se goal a khung lo.

Hmahruaina goal khungtu chu Bayi Kamo Stephane a ni. Mipui beisei a phak loh avanga sawisel hlawh ṭhin Ivorian forward hian Jayesh Rane ball pek chu la fuh tawk lo mah se a ball lak perin Churchill defender kap karah a luh avangin chiang zetin a pet goal.

Kamo hian first half-ah chance ṭha bik a hlah a, minute 69-naah goal pawimawh a khung. Aizawl FC-in inkhel an thunun chhunzawm a, minute 77-naah Chullova ball vawrh luh chu Churchill defender Banpynkhrawnam Nongkhlaw-a'n an lamah a tauh lut. Mizo club-in an mualah Goan club a vawi khat nan an hneh a, an chakna zat chu 3-1 a ni.

A tla chawp zelin
Aizawl FC-in point 16 an hmu a, Mohun Bagan nen an point hmuh zat inangin hmahruaitu East Bengal point thum chiahin an hlat ta.

AFC coach Khalid Jamil chuan, "Keini chu champion la beisei ngam tur kan ni lo a, kan match khelh hmabak apianga theihtawp chhuah hi kan tih tur a ni. Bengaluru hmachhawn turin kan inpuahchah nghal ang," tiin a sawi.

Inkhel chungchang sawiin Khalid chuan, "Kan rilru put hmang kha ka fak a, ka player-te hian chak loh an duh lo. Kamo-a'n goal a khung ve ta a, hei hi amahah hian ka beisei reng a ni. First half-ah chance ṭha bik a hlah a, a khelhpui player-te'n an chhan tlat a, a zam phah loh bawk," tiin a naute rilru put hmang chhuang takin a sawi.

Aizawl FC hian February 15, Nilaini khian I League champion lai Bengaluru FC an mikhual dawn a, February 20, Thawhṭanniah hmahruai mektu East Bengal an mikhual leh nghal ang.