Siaha rawlthar an thiam ber

Siaha chuan goal hnih an phurh hnuah Ng Lal­dinpuia goal hnih leh HC Marshall goal khat khung hmanga Kolasib 3-2 a lehthalin, nimin khan an mualah Inter District Junior Football Championship nomawi an chawi.

District Playground, Vaihpi-a inkhelah Kolasib-in bul an ṭan ṭha zawk a, Vishal Gurung (38') leh Vanlal­nghaka (40') te goal hmangin 2-0 in hma an hruai hman. Siaha hi nikum group stage-a an ngam loh Kolasib lakah an tlawm ngei dawn niin a lang.

Mahse, Siaha hian kumina an match hmasa berah Kolasib hi 5-1 in an sawp tawh a, final-a goal hnih an phurh hnuah pawh an zam lo.

An intawn hmasaka goal hnih khungtu Ng Laldinpuia chuan first half tawp hma chiahin an siphurh a sut a,minute 56-ah Marshall chuan corner aṭanga ball lokal chu tauh lutin an si phurh a sut zo.

Hun tawp dawnah Siaha tan Laldinpuia bawk a inlar leh, semifinal-a Mamit 1-0 a an hnehna goal khungtu hian mual veilam sir aṭanga ball lalutin Kolasib defender kar­ah minute 90+1-ah chakna goal a khung; tun tournament chhunga a goal sarihna niin top scorer a ni.

Siaha coach F. Lalmuanpuia chuan, “First half-ah kan talbuai hle a, second half-ah erawh ka naute an khel ṭha. Siaha DFA leh mipuite min ṭawiawmnaah kan lawm a, kan champion theih nana a tir aṭanga a tawp thlenga min hruaitu Pa­thian chungah lawmthu ka sawi bawk,” tiin Vang­laini palai a hrilh.

Kolasib coach C. Malsawmtluanga (Junior-a) chuan, “Ka naute an naupanna a lang a, tharumah kan hneh loh avangin kan tuar. Hma kan hruai hnuah goal thum kan chhuah leh a, kan tawnhriat neih tam loh vang a ni,” tiin a sawi.

Inkhel a hmuhnawm a, mipuiin an hlut a, khelmual leh a chhehvelah mipui an khat tlat. Inter District Junior Football Championships-ah chuan entu mipui an ṭhathnem ber pawl a ni.

Lawmman
Top Scorer Ng Laldinpuia, Siaha (7 Goals )
Best Player David VL Hmangaihzuala, Kolasib
Fairplay Award Aizawl DFA