Kolkata Derby ; Jeje leh Didika an inpeih tawh!
Khawvel football derby ropui an sawi apianga sawi hmaih thiang lo khawpa ropui, Kolkata Derby chu Pathianni tlai dar 4:35 hian Kanchenjunga Stadium, Siliguri-ah khelh a ni dawn. Indian club liana player pawimawh Jeje Lalpekhlua leh Lalrindika Ralte te chuan derby hmachhawn tura an inpeih tawh thu an sawi.
Team pahnih hi I League nomawi chawi tuma sum tam tak seng ve ve an ni a, tun hmaa an lo inhuat tawhna thinlung zawng zawng nen a tlawm zawk nih an duh dawn lo.
East Bengal captain Didika'n Bagan hneh loh chu point ruk hlohna ang tluk a nih tur thu a sawi a; AIFF player of the year Jeje-a ngaihdan pawh chuti bawk.
Trevor vs Sanjoy
Mohun Bagan-in I League nomawi an chawi tawh a, East Bengal-in an la chawi ve lo.
S. Malsawmtluanga profe-ssional career inṭanna club hian Bagan tih theih ang tih ve theih loh an duh lo a, an coach hlui Trevor Morgan an kokir.
British coach hian Bagan a ngam khawp a, vawi 12 a hmachhawn tawhah vawi hnih chiah a tlawm - a khingpui tur Sanjoy Sen hi derby match vawi nga a hmachhawn tawha vawi khat chiah la chak a ni thung. Mahse, Indian coach hian British coach chhuk enna a nei ve tho - I League nomawi a chawi tawh tlat!
Hmanah chuan...
Indian football legend Bhaichung Bhutia chu Kolkata Derby a goal khung hnem ber niin goal 19 a khung a, goal 13 hi East Bengal tan niin goal ruk dang hi Mariners a pan hnuah a ni thung.
Baichung-a derby goal zinga hriatreng tawh tur chu kum 1997 Federation Cup semifinal kha a ni. East Bengal hian an hmelma kumhlun hi 4-1 zetin an sawp a, heng zinga goal thum hi Sikkimese striker hian Salt Lake Stadium-a mipui 131,000 pungkhawm hmaa a khung a ni.
Didika vs Jeje
FIFA meuhin classic derby a tih zinga a telhah Mizo hmel a lang dawn a ni mai lo a, player pawimawh niin an inlar dawn.
East Bengal captain armband hreng chungin Didika a inlan leh dawn a, Jeje hian Mohun Bagan-ah hmun pawimawh a chang leh dawn tih a chiang bawk - Kolkata Derby hi Mizo tak pawhin a hmuhnawm ang!
Didika'n tun season-ah league match ruk khelin goal khat a khung a, a ṭhiante thun tur vawi hnih a siamsak tawh.
Hnahthial tlangval Jeje hian league match nga chiah a la khel chungin goal li a khung leh der tawh a, India international striker hi derby-a goal khung turin a ṭha tawk.
Point ruk
Didika chuan Mohun Bagan nena an derby match khelh tur chu point ruk inchuhna a nih tur thu a sawi a, chak zawk tan champion kawng a inhawn zau sawt a rin thu Vanglaini palai a hrilh.
Lunglei tlangval chuan, "Bagan hi tun hnaiah an chak tluang em em a, hneh an harsa dawn. Kan hneh a nih erawh chuan point thum kan hawn a ni mai dawn lo a, Bagan point thum kan chhuhsak bawk tihna a ni dawn a ni," tiin a sawi.
Didika chuan, "Bagan leh Bengaluru te nen hian champion nomawi kan inchuh ka rin thu ka sawi tawh a, ka dinna ngaiah ka la ding reng. Vawi khat chetsual a pawi thei a, Aizawl FC hian hma an sawn bawk si avangin match tin hi a pawimawh em em vek. Kei chuan champion ka duh a, ka duhna tihlawhtling turin theihtawp ka chhuah ang," tiin Vanglaini palai a hrilh.
East Bengal tan league match sarih an khelh a-ṭanga goal nga ve ve khung tawh Willis Plaza leh Wedson Anselme an awm a, Bagan tlarhnung tan Didika hoin hna hautak siamtu an ni ang.
Champion kalkawng
Chennaiyin FC aṭanga Bagan-a loan a khel mek Jeje chuan, "Ka dam ṭhat phawt chuan starting eleven ka chan ngei ka beisei. Team pahnih intiat tawk tak kan nih avangin kan inbei tawk khawpin ka ring a, derby hi chu a boruak a danglam avangin tun hnai result-in kawng ro a su tehchiamin ka ring lo a," a ti a, sulhnu hluia hahdam chi a ni lo tih Vanglaini palai hnenah a sawi.
Jeje chuan Didika ngaihdan ṭawmpuiin, "Derby a kan result azir hian team pahnih hmabak chu kan chingfel thei deuh thawah ka ngai a, East Bengal kan hneh phawt chuan hmabak pawh a phurawm lehzual dawn a ni," a ti.
Bagan hian tlarhmaah Jeje bakah Katsumi Yusa, Darryl Duffy leh Sony Norde an nei a, East Bengal tlarhnung ṭhiat turin an ṭha tawk.
Zanin Inkhel Tur
Shillong Lajong 4:35 PM DSK Shivajians
Chennai City 7:05 PM Mumbai FC
Bengaluru 7:05 PM Minerva Punjab
February 12, Pathianni Zan
East Bengal 4:35 PM East Bengal