Reds buaina karah champion tum Spurs

Season ṭantira champion tum Liverpool-in champion an sawi ngam tawh lo a, season tawpah Champions League kan khel phak ang em, tih chu beiseina an neih ngam tawk a ni tawh. Hull City hneh lo hlim Liverpool-in insiam ṭhat an tum lai takin zanin dar 11:00-ah Tottenham Hotspur an mikhual a ṭul dawn. Jurgen Klopp-a naute tan insiam ṭhat nan chuan an khauh hret mai thei - zaninah a chhanna pekin a awm dawn.

Hmahruaitu Chelsea hnuai chiaha awm Tottenham Hotspur erawhin champion beiseina an la nei ngam a, manager Mauricio Pochettino chuan point kuaa sang fal mek club hi umphak theih an la nih thu a sawi mauh mai! Argentine manager chuan, "Chelsea hian fal takin hma an hruai tawh tih hi zep rual a ni lo a, umphak theih loh erawh an ni lo," a ti. Spurs hian an ṭhenawm club Blues umpha tur chuan zaninah Liverpool hi an thenfai hmasak tur a ni - a harsa dawn tih hi zep rual a ni lo.

Liverpool buaina

Reds-in tun season a league match an khelh tawhah chak hmel an la hmu lo a, inelna hrang hranga an match hnuhnung 10-ah vawi khat chiah hnehna an chang thei - Liverpool-ah hian dik lo a awm tih a chiang a, kawh rawn hlawh ber chu an tlarhnung hi a ni. Reds hian attacking play hmuhnawm tak an lantir ṭhin tih zep rual a ni lo a, season ṭantirah an goal nawr a na lehzual.

Mahse, inkhel a tam tawlh tawlh a, player inhliam leh chauin squad a nghawng ṭan a, Reds-in inkhelh apiangin ball chang tam viau ṭhin mah se tlarhnung lamin goal chhuah an uar em avangin beisei an phak thei lo - Swansea City, Wolverhampton leh Hull City an hmachhawn ṭumin hmuh turin a awm. Reds-in league kal mekah goal 30 chhuah tawhin heng zinga 16 hi set piece aṭanga lut a ni.

Liverpool buaina tlarhnung lam a ni tih tilang chiangtu chu an league match hnuhnung pangaa Hull, Chelsea, Swansea, Manchester United leh Sunder­land an hmachhawn ṭumin target-ah an khingpui ten shot vawi 15 zet an nei a, goal 11 an chhuah! Tun season a league goal 14 khung tawhtu Harry Kane awmna team an mikhual dawn a, Klopp-a'n tlarhnung tih phui dan a ngaihtuah ran a ṭul ang.

Nomawi a la awm e

Liverpool-in tun hnai an result-ah beisei phak lo mah se Tottenham boss Mauricio Pochettino chuan Klopp-a naute chu a la dah sang hle. Anfield-a lenglut tur manager chuan, "Liverpool hi ka ngaihdan chuan England a squad ṭha ber pawl an ni satliah mai lo a, Europe-ah pawh team ṭha ber pawl an ni. Reds ang tho hian nikum November-ah khan harsatna kan lo tawk tawh a, match 10-ah vawi khat chiah chak kan nei ve tho. Season tluana khel kan ni a, eng team pawhin chet chhiat lai kan nei vek a ni," a ti.

Tottenham mangaer chuan sawi chhunzawmin, "Liverpool hi an khelhdan phung avangin ka zah em em a, anmahni ang thoa kan fin ve a ngai dawn a ni. Team pahnihin chak bak kan ngaihtuah dawn lo tih a chiang a, a hautakin a harsa takzet dawn a ni," tiin inkhel hmuhnawm tak an chhawpchhuah a rin thu a sawi.

Argentine coach chuan nomawi beiseina a la thih loh thu sawi lang nghalin parukna Manchester United thleng pawhin beisein an la neih ngam thu a sawi. Pochettino chuan, "Spurs mai ni loin team dang tan pawh nomawi hi beisei ngam a la ni a, team tam takin nomawi chawi an duh a, chumi tur chuan inkhelh tur pawh tam tak a la awm a ni," a ti.

Klopp = Rodgers

Liverpool-in Brendan Rodgers bana Jurgen Klopp an lakluh khan an beisei chu Premier League nomawi a ni a, mah se German coach ai hian Celtic manager Rodgers chuan nomawi a hnaih tawh zawk - Scottish Premiership lamah point 27-in hma an hruai fal tawh a, match 24 khelh tawhah an la tlawm miah lo.

Anfield lama a sulhnu chhui pawhin Welsh manager leh Klopp te hi an game hmasa 54-ah an dinhmun a in ang chiah chiah! Borussia Dortmund boss hlui hian Reds a kaihhruai hmasak match 54-ah hian vawi 26 hnehna chanpuiin vawi 16 an khingpui a inhnehtawkpui a, vawi 12 zet an tlawm - Reds a enkawl hmasak match 54-a Rodgers dinhmun pawh hetiang tho hi a ni!

An match hnuhnung bera Hull ngam lotu Klopp hian Liverpool talbuainaah mawh a phur thu a sawi a, hetihrual hian a player te chu in thing harh turin a chah bawk. German coach chuan, "Keimahni leh keimahni pressure insiam chawp hi hobby ang deuhin kan nei tawh a, tunah chuan kan inthin harh a hun tawh takzet a ni. Keimah mai ni loin ka player-te pawn inenfiah an mamawh a, kan rilru natna hi khelmual chhungah kan thawi dam a ngai tawh a ni," a ti - zaninah thawi dam zo tak ang maw.

Reds vs Spurs (Nambar zawngin)
• 1 - Reds-in an match hnuhnung 10-a chak hmel an hmuh zat
• 2011 - Spurs-in Anfield a hnehna an chan hnuhnung ber a ni a, 2-0 a an chakna inkhelah hian goal khungtu chu Rafael van der Vaart leh Luka Modric te an ni.
• 11- Spurs-in match 11 chhung tlawm hmel an hmu tawh lo a, vawi kua hnehna changin vawi hnih an khingpui an inhnehtawkpui.
• 52 - Liverpool leh Arsenal-in league-ah goal 52 an khung tawh a, Premier League a goal khung hnem ber an ni mek.
• 16 - Spurs-in goal 16 chiah league-ah an la chhuah a, Premier League a goal chhuah tlem ber an ni mek.