Champhai champion-in Aizawl champion an hneh

Mizoram Super Lea­gue Season 4 Qualifier match hmasa berah Cham­phai champion Mi­nikins-in Aizawl champion Republic VR4 chu 76-72 in an hneh. .

Tu nge tling dawn?

Minikins hian nizan khan an match hnuhnung berah Division I finalist Dawrpui Vengthar SC an hmachhawn a, hnehna an chang a nih chuan MSL4 khel turin an tling ang.

DVSC hian hnehna an chang a nih chuan Republic Vengin Mizoram basketball inelna sang bera club neih ve ngei an tumna chu a nung thar thung ang.

Zanin dar 7:00 hian Division I final rematch chu Hawla Indoor Stadium-ah khelh a ni dawn. Minikins, DVSC leh VR4 te hi vawi khat ṭheuh an inkhelh kual hnua an point hmuh zat a inang vek a nih chuan goal difference en tur a ni.

Champhai an ni tlat!

Minikins player zing­ah Hawla Indoor Stadium hre chiang chu MSL1-a Zarkawt Serpents guard C. Lalremruata chiah a awm a, veteran player TC Lalchhuanmawia pawhin MSL khelhna hmunah hian inelna lian a la hmachhawn lo.

Republic VR4-in veteran player Darlian­sanga (28 pts) hmangin inkhel thunun nghal mah se second quarter tawp hma hretin Champhai club-in an lehthal a, an hawikir tawh lo. Minikins hian an khingpui angin chet chhiat lai an nei lo a, hun tawp thlenga game ngai reng an khelh theih avangin hnehna an chang.

Minikins tan Rem­ruata'n point 18 neiin a che ṭha tluan a, R. Lalro­puia che rang lo mah se a dribbling nghet ṭha tak leh shooting ṭha tak hmangin point 16 a nei a, C. Vanengmawia leh C. Vanlalpeka ten point riat ve ve nei bawkin Cham­phai club chakna kawngah an thawh hlawk bawk.

Republic VR4 lam erawh Division I final leh MSL4 Qualifier inkara ni khat chiah a tlak avangin an lungawi lo a, an chak loh chhan tak erawh inelna an lak thutak tawk lo vang a ni. VR4 hian hun tawp lamah ṭantu nei ṭha mah se ṭantirh aṭanga court chhung leh pawnah theihtawp an chhuah loh avangin hun tawp thlengin an theihna tak an pho chhuak thei lo.

Eng ngei an sawi?

Champhai adviser Mapuia Ralte chuan, "Champhai champion-in Aizawl champion kan hneh hi kan lawm a ni," tiin thu tawite awmze nei tak a sawi.

Champhai manager Ramnunsiama (Mama) chuan, "Champhai ṭawi­awm tura an hun hlu tak rawn seng zawng zawng chungah kan lawm tak zet a, player-te'n court chhunga theihtawp kan chhuah avangin ka lawm hle bawk," tiin Vanglaini palai a hrilh.