Champions League khel tur United?

Manchester United-in league match 15 chhung hneh loh an tawng tawh lo a, zanin dar 8:30-a Watford an hneh thei a nih chuan Premier League table-ah a sang pali zingah an inhlangkai ang.

Jose Mourinho hote hmachhawn tur Waford hian match zawnin Arsenal leh Burnley te an hneh a, Vicarage Road-ah nikum September thla khan United hi 3-1 zetin an barakhaih bawk.

Hornets (Watford sawina) hian January transfer hmang ṭangkaiin AC Milan aṭangin striker M'Baye Niang chu loan hmangin an hawh a, hemi hma hian Fiorentina aṭangin Argentine forward Mauro Zarate leh Everton aṭangin United midfielder hlui Tom Cleverley an lakluh avangin team ṭha zawk an ni tawh.

Manchester United hian an hma­bakah Ligue 1 club Saint-Etienne chu Europa League-ah an hmachhawn dawn a, FA Cup-ah Blackburn Rovers an khelhpui dawn bakah EFL Cup final-ah Southampton an hmachhawn dawn. Jose Mourinho hoten Premier League an khelh leh hun tur chu March 4 daih a ni dawn a, Red Devils hian AFC Bournemouth an mikhual ang.

United midfielder Michael Carrick chuan, "Champions League khelh phak hi a hranpaa lawmna tur a ni lo - palina, pathumna leh pahnihna hi kan tum ber a ni lo. Kan champion chauhin kan lawm tur a ni a, chutihrualin Champions League khelh phak hi a pawimawh a ni," tiin tum sang tak an neih a ṭul thu a sawi.