La Liga ; Kartawpah club lian inlan kim dawn
Spanish La Liga kartawpah khelh a ni leh dawn a, club lian pathum Real Madrid, Barcelona leh Atletico Madrid te an inlan vek dawn. Hmahruaitu Real-in an hnuai chiaha awm Barcelona aia vawi hniha khel tlem zawk nichungin Catalan club hi point khatin an la chhuk en a, palina Atletico tan erawh vawi hniha khel tam zawk chunga point sariha an phak loh tawh Real an sang lutuk hret - Champions League bak beisei ngam chi a ni lo.
Zanin dar 8:45-ah Copa del Rey final urlawkna en turin a awm nghal dawn a, Deportivo Alaves khelmualah Barcelona an lenglut ang - team pahnih hi Spanish Cup final lut hlim an ni. Pathianni zanah Madrid khaw club pahnih an inlan dawn thung a, Real-in khualmualah Osasuna lenchilhin Atletico hian anmahni ang thoa Spanish Cup semifinal aṭanga tla hlim Celta Vigo an mikhual thung ang.
Enrique a lungawi lo
Barcelona-in Spanish Cup semifinal-ah harsa taka Atletico Madrid hneh chungin final an lut a, coach Luis Enrique lawm a kim thei lo. Barca boss chuan, "Kan chhehvelah enge awm tih en loin kan hmaa thil inchhawp zawk kan thlir tur a ni," tiin a naute chu inkhela rilru pe tawk loah a ngai a, zanina Alaves an lenchilh hunah Spanish manager hian Barca ṭha zawk hmuh a beisei ang.
Catalan club ṭantute tana thu hriat nuam lo tur erawh Copa del Rey final-a an la hmachhawn tur Alaves hi awlsam taka hneh ngawt theih an ni dawn lo. Season ṭantir lam khan Barca hian kaithar Alaves hi Nou Camp-ah an mikhual a, rin loh takin 2-1 in an tlawm! La Liga kai thar nih kuma Spanish Cup final lut nghal thei club hi Barca tan zuam sual theih an ni.
Real an dam
January thlaah hliam vangin Real Madrid talbuai viau mah se Pathianni zana Osasuna an lenchilh hunah erawh Real-in squad pumpui deuhthaw hman theih turin an nei tawh dawn - Celta Vigo an hmachhawn ṭuma hrem tuar tur Toni Kroos erawh Celta nen an inkhelh hun sawn a nih avangin Osasuna lakah a hremna a tawrh a ngai dawn a, German midfielder tel loin Real an inlan a ngai dawn.
Rei tak hliam vanga a chawlh hnuah Gareth Bale-a'n training a zawm leh tawh a, Zinedine Zidane-a'n a duh chuan Welsh forward hi a chhawr leh thei tawh ang. Real Sociedad laka khel ṭha tak Mateo Kovacic chuan Toni Kroos hmun ruak a luah beisei a ni a, Luka Modric leh Dani Carvajal te chu chhawr theih turin an dam tawh bawk.
Atletico tan Champions League
Diego Simeone-a nauten La Liga an beisei ngam tawh lo a, Spanish Cup semifinal aṭangin Barcelona-in an pet chhuak bawk. Mahse, Madrid khaw club tan chawlh ngawt erawh a thiang lo. An hnuai chiaha awm Real Sociedad aia an sanna chu point khat chauh a ni a, pathumna Sevilla chu point liin an phak lo bawk. Spanish club ṭha hi season thara Champions League khel thei lo dinhmunah an ding tlat - vawi 21 league match an khelh tawha vawi 11 chiah la chak Simeone-a naute tan tun hi thawh hun chu a ni.
Atletico tan beisei ang result hlawhchhuah ngawt erawh thil awlsam a ni dawn bik lo. Anmahni ang thoa Spanish Cup semfinal aṭanga tla hlim thinrim Celta Vigo an mikhual dawn a, an khelh ṭhat ni chuan Real Madrid pawh hneh thei an nih avangin zuam sual an awl ang - tlarhnung ven thiam vanga hming ṭha ṭhin Barca tan tun season a goal 15 khung tawh Iago Aspas ven uluk a ṭul ang.