Koeman-a'n Lukaku chelh a duh

Everton manager Ronald Koeman chuan an khel ṭha chho zel a nih chuan an striker chuanvawr Romelu Lukaku chu chhuak lo tura an chelh theih a beisei thu a sawi.

Belgium international hian an match hnuhnung bera Bournemouth an hamchhawn ṭumin goal li zet a khung a, Premier League season kal laiah goal 16 khung tawhin top scorer a ni mek.

Koeman chuan, "Player ten an hmalam hun an thlir ṭhin a, an mahni leh club-in nitin hmasawnna a nei zel a nih chuan hmun dang pan chhan tur a awm lo. A pawimawh berah chuan thlen chin aṭanga hmasawn zel hi player-te hmun danga chhuak lo tura kan chelhna ṭha tak a ni," tiin a sawi.

Toffees manager hian tun season tir khan Koeman hian a theihna tak tak pholang tur chuan Goodison Park-a chhuahsan a ngaih a rin thu a lo sawi tawh a, hei hi beisei anga season bul an ṭan ṭhat tawk loh vang a ni pakhat.

Nikum December thla khan Everton hian an hmelma Liverpool an hneh lo a, hemi hnuah league match sarih khel leh tawhin chak loh an nei lo. Lukaku agent Mino Raiola chuan contract pawt sei tura an inpeih thawkhat tawh thu a lo sawi ve leh tawh a ni.

Koeman chuan, "Player te hian thil tum leh nih chak an nei vek a, mihring nih chuan hei hi chu thil thleng tur chiang sa a ni. Kan player te hi kan hnena hun rei zawk cham vek turin kan duh a, chung zinga pakhat chu Lukaku hi a ni," a ti.