Thunder lakah Cleveland an tlawm

NBA regular season kal mekah Cleveland Cavaliers-in beisei an phak thei rih lo. NBA champion lai hi nimin zing khan Oklahoma City Thunder lakah 118-109 in an tlawm.

Chesapeake Energy Arena-a inkhelah Thunder tan Russell Westbrook a khel ṭha hle a, Ameri­can star hian court chhungah minute 35 hun a hman chhungin point 29 a score bakah rebounds vawi 12 lain assists vawi 11 a nei bawk. Ani bakah hian point 20 score tu Steven Adams leh Victor Oladipo (23 pts) ten an thawhhlawk takzet bawk.

Thunder hian tun season-ah match 31 hnehna an channa chiah a ni a, vawi 23 an chak lo tawh thung. Pathianni zing dar 7:00-ah Golden State Warriors an hmachhawn ang.

Cavs tan Kyrie Irving chu in­khelh chhungzawnga hmuhnawm ber a ni a, point 28 a score bakah assists vawi ruk a nei bawk. Nikum NBA Final MVP LeBron James-a'n point 18 bak a score thei lo a, Kevin Love pawhin point 15 a pel thei lo - tun season-a a vawi 16 nan Cavs an chak lo. Pathianni zing dar 6:00-ah Den­ver Nuggets nen an inkhel leh ang.