Inkhelh tam duh Wilshere

Jack Wilshere-a'n a hmalam hun a la ti chiang thei lo a, tun dinhmuna a duh ber chu a tam thei ang ber inkhelh a nih thu a sawi chhuak.

Arsenal midfielder hi hliam vangin a buai ngun a, Gunners mana­ger Arsene Wengre hnuai­­ah khelhna hmun a chan mumal dawn loh avangin loan hmangin Bournemouth a zawm. Cherries tan tun season-ah league match 19 khel tawhin an player pawimawh a ni.

Kum 25-a upa Wil­shere chuan, "Thla thum thla li chhung vel hi a ṭha thei ang bera khelh phawt ka duh a, season tawpah lungmuangin ka hmalam hun chu ka ngaihtuah ang - ka dah pawimawh hmasak chu inkhelh tam theihna tur hmun a ni," a ti. Wilsehre hian tun season bakah kum khat dang bak Gunners tan contract a nei tawh lo.

England international chuan sawi chhunzawmin, "Bournemouth hian hun pawimawh an tawng mek a, tuna kan thil tum pakhat chu season thara Premier League khelh chhunzawm zel a ni. He hmunah hian nuam ti takin ka inkhel mek a, a sang thei ang ber thleng tura puih hi ka tum a ni," tiin a sawi.

Bournemouth hian an league match hnuhnung pangaah chak ni hmel an hmu lo a, league table-ah 14 na an ni mek - Thawhṭanni zanah Manchester City an mikhual ang.