Mangṭha Champions League? Hello, Europa League...!

Mikel Arteta-a'n Arsenal a enkawl tirh khan Europa League an khel, bazar hun vawi li a hmang liam a, dollar maktaduai 300 vel an hmang zo - tuna an hnaih ber chu Europa League tho a ni!

Arsenal kutah engkim a innghat ṭhin, fal taka Tottenham leh Manchester United tlansan theihna remchang pawh an nei fo, mahse tuna an tih theih chu Spurs chetsual chan a ni ta, tlak hlau Everton an hneh kher ang em, tih pawh zawhna lian a tling.

Gunners hian chak ngei ngei mamawh chungin Newcastle United an lenchilh a, 2-0 in an mualpho. Ben White-a'n anmahni lamah a tih luh bakah, mualneitu tan Bruno Guimaraes chuan an goal hnihna a khung bawk.

North London club an tlawm avang hian pathumna Chelsea chuan an dinhmun an sawhnghet ve chiah. Blues hian season tharah Champions League khel turin ticket an nei fel ve nghal a ni.

A goal lo
Newcastle hi season tir lama tlak hlauhawm zinga mi kha an ni a, mahse an insiamṭhat chinah erawh team hlauhawm zinga mi an ni phak. Amaherawhchu, chak ngei ngei ngai inkhelah Arsenal hi rinkai zawk tiin an sawi ngam.

St James' Park-ah fans thawm a ṭha a, player 12-na dinhmun hneh takin an chelh. A tir aṭangin Magpies an hlauhawm, tharum ngah Saint-Maximin a talput zauh zauh a, keeper Aaron Ramsdale tan hna hautak pawh a siamsak.

Chawlhlawk hmain goal a lut lo. Bukayo Saka-a'n chance a insiamchawp hmanga shot a neih ve zauh bak chu Arteta nauten goal hlauhawm sawi tur an nei lo, goal chhuah loa chawlhlawk an hmang thei erawh an lawm ang.

A goal ta
Second half tirah Joelinton-a'n hlauhawm takin a cross a, box chhunga awm Callum Wilson vengtu Ben White chuan anmahni lamah a tlawh lut, khel ṭha leh chungnung zawk Magpies lamin goal an nei.

Emile Smith Rowe la chhuakin Gabriel Martinelli dah luh ni mah se Arsenal goal nawr a na thei lo. Mohamed Elneny-a'n yard 25-a hla aṭangin keeper Martin Dubravka tan hna a siamsak a, a bak chu target zawna shot an nei zui lo.

Si phurh sut tuma rilru an sen luatah Gunners tlarhnung a pawp. Granit Xhaka ball pet chhuah ṭha tawk lo nghawngah Guimaraes chuan an goal hnihna a khung, mikhual tan chhanletna hun awm loin hun a tawp chhunzawm.

Boruak zo lo
Arsenal hian Champions League khelh phak an duh a nih chuan, inkhel pawimawh leh boruak sanga point thum hmuh an zir a ngai niin a lang, hun pawimawh laia chesual khut ṭhin chung chuan palina china awm a harsa dawn.

Hmanni lawk kha chuan Tottenham aiin point lia sang chungin palina an ni. Mahse, Spurs lakah an tlawm a, tunah chuan pangana niin an elpui North London club aiin point hnihin an hniam zawk.

Spurs laka an mualpho ṭum khan penalty an chawi danah leh, defender Rob Holding an hnawhchhuah danah Arteta-a'n match official a sawisel, tun ṭumah erawh sawisel tur a zawng a nih chuan, a thutlukna fuh lo leh player thathona nei lo chu sawisel theih a ni ang.

Hlau leh khur chu kir leh rawh se - Xhaka
Arsenal midfielder Granit Xhaka chuan inkhelh banah an khelh ṭhat loh thu a sawi a, beisei an phak loh avangin fans chungah ngaihdam a dil bawk - thil thleng tawh erawh siamṭhat theih a ni chuang lo.

Switzerland international Xhaka chuan, "Hetiang match khel tura inpeih lo chu inah awm zawk mai rawh se. Kum naupang hi chhuanlam a tling lo, i hlauthawng a nih chuan bench-ah ṭhu mai la, a nih loh pawhin inah awm zawk mai rawh.

"Huaisen taka inkhel ngam kan mamawh. Kan tan chuan inkhel pawimawh berte zinga mi a ni a, tuna kan result hi a lawmawm lohin a zahthlak, a hrehawm takzet," tiin ṭawngkam pawh a duhtui lo viau. Arsenal captain dinhnun chelh tawh, khelmual chhung leh pawn lama neuh neuh a neih vanga captain armband an hlihsak tawh a ni a, mahse tun hnaiah erawh Xhaka hian hmun pawimawh a chang phak.

Xhaka chuan sawi zawmin, "Inkhel hmuhnawm chauh ni loin ropui leh ṭha kan mamawh laia kan ti thei lo hi a pawi ka ti. Newcastle khan a tir aṭanga a tawp thlengin min um peih, keini chuan chu chu kan thei ve si lo. "A nihna tak sawi chuan, tun ṭuma kan khelh ang kha chuan Champions League khelh kan phu lo," tiin a sawi. Hruaitu ṭha chungchangah chuan, tennis ni loa football an khelh avangin mimal tin an pawimawh vek thu a sawi bawk.

Arsenal beiseina hi a tawp vek erawh a la ni bik lo. Emirates Stadium-ah Everton hneh se, inkhel dangah tla chiang tawh Norwich City laka Spurs an tlawm hlauh chuan UCL ticket an la nei thei. Xhaka chuan, "Eng pawh a la thleng thei, football a nih miau avangin beisei kan nei tur a ni. Amaherawhchu, kan kuta awm a ni tawh lo, midang result kan ngaihchan a ngai tur hi a pawi," a ti.

Newcastle kha keini aiin a let 10 zetin an khel ṭha zawk, kha thil kha a lungchhiat thlak takzet. A nihna tak sawi chuan tun ṭuma kan khelh ang kha chuan Champions League pawh kan hnaih lo. Kan kuta thil engkim awm tawh kha tunah chuan a ni ta lo, a pawi tih bak chu sawi tur a vang. Kawng tinrengin Newcastle kan phak lo kha a mak. Danglamna siam tumin ruahmanna kan thlak a, chu pawh chuan kawngro a su thei bawk si lo. Hliam kan nei a, chu erawh chhuanlam atana hman a remchang lo ang. - Mikel Arteta, Arsenal Manager

Newcastle United ka enkawl china kan khelh ṭhat ber ṭum a ni. Min thlawptu fans tha tak hmaa khatiang kan khel thei kha mimal tak pawhin lawmawm ka ti takzet. Arsenal kha team ṭha an ni a, chu team ṭha hmaah chuan tharum bakah theihna sang tak nen kan khel thei. Kan goal nawr a na a, a venhim hna kan thawk ṭha bawk. Tun season EPL atana kan home match hnuhnung ber a ni a, fans hmaa season match hnuhnung kan khelh dan kha a lungawi thlak hleah ka ngai - Eddie Howe, Newcastle United Manager