Real Madrid-ah Mbappe a chiang hnai

Kylian Mbappe chuan Real Madrid tan contract a ziak dawn ngei niin a lang ta. Spanish football expert Guillem Balague sawi dan chuan, mimal inremna an nei tawh - tun thla tawp lamah chuan thuin an ziak fel hman tura ngaih a ni.

France international Mbappe-a'n Paris St-Germain tana a contract neih lai chu June thlaah hian a zo dawn. April thla khan Mbappe leh Real hian inremna an nei tawh nia sawi a ni a, a taka puanchhuah erawh a la ni lo.

PSG chuan an forward hi chelh hram dan an la ngaihtuah ve reng, hlawh ṭha tawk tak bakah kum hnih chhung atan euro maktaduai 150 (signing-on fee) zeta thlun ngheh an tum, amaherawhchu an duhna hi a thamral dawn niin a lang.

Balague chuan, "Real Madrid chuan inremna an neih tawh kha an ringtawk a, player pawhin a zahsak ngei an beisei. PSG lamin chelh turin theihtawpin hma an la bawk. Paris club hian thuthar nei mah se Real Madrid chu an inringtawk hle," a ti.

May 22, Pathianniah PSG hian an league match hnuhnung ber atan Metz an mikhual dawn, chumi hnuah Mbappe hian Nations League khel turin France squad a zawm ang, an ram team a zawm hmain a hma hun a tihchian a rinawm.