Zanin dar 12:30-ah Europa League final ; Eintracht Frankfurt vs Rangers

Europa League final-ah Europe team langsar an inhmachhawn dawn lo a, inelna ṭantirha rinkai ni pha lo Eintracht Frankfurt leh Rangers te an inhmachhawn dawn. Nomawi inchuhna hi zanin dar 12:30 hian Ramon Sanchez-Pizjuan Stadium, Seville-ah khelh a ni dawn a, final a nih tawh miau avangin a entlak ang.

Barca hnehtu
Eintracht Frankfurt hi German club vantlang an ni a, Europa League-a an chet ṭhat avangin Bundesliga-ah an che ṭha tawk lo. Frankfurt hian 11-na ni chungin season an khar a, chutihrualin Europa League-a an champion a nih chuan Champions League an khel dawn.

Oliver Glasner kaihhruai Frankfurt hian group stage-ah hneh loh an tawng lo a, Olympiakos chungah an awm. Knockout stage-ah Copa del Rey champion Real Betis an pet thla a, chu aia ropui zawk chu champion tura rinkai ber Xavi enkawl Barcelona an hneh.

Khelmual chhung leh pawnah Frankfurt an che ṭha. Barca an hmachhawn ṭum hian Catalan club hian mikhual team hi ticket 5,000 an pe. Mahse, Nou Camp-a entu 79,468 zinga 30,000 vel chu German club ṭantu an ni a, Barca khelmual chu an mual ang mai a ni.

Semifinal-ah Frankfurt-in West Ham an hmachhawn a, English club-in final lut an inring hle. Mahse, German club hian inkhel pahnihah an hneh ve ve. Europa League-ah dah hniam an thiang tawh lo.

Lal thar 'Gio'
Rangers-in Steven Gerrard an lalut a, Liverpool legend hoin Scottish Premiership-a Celtic rorelna an titawp. Celtic hian kum zawnin kum kua an champion a, Gerrard hi chhamdantu a ni. Amaherawhchu Gerrard hian hna ṭha zawka a ngaih Premier League club vantlang Aston Villa enkawl a thlang zawk a, Rangers a chhuahsan.

Gers-in Gerrard a thlak nan an player hlui Giovanni van Bronckhorst an lalut a, Arsenal leh Barcelona tana khel tawh a ni bawk. Borussia Dortmund midfielder 'Giovanni' Reyna pawh hi Bronckhorst hming chawia sak ngat a ni.

Gio hian Scottish Premiership hum thei lo mah se Rangers hi Europa League final a hruai thleng a, Gers ṭantute hi Gerrard a chhuah avangin an lawm tawh hial ang. Hei chauh hi a ni lo, tun kar tawp hian Hearts nen Scottish Cup final an khel dawn. Nomawi pahnih chawi thei dinhmunah an ding.

Rangers hi final-ah rinkai lo zawk ni mah se final thleng turin German club ṭha pahnih Borussia Dortmund leh RB Leipzig te an hneh. Bundesliga table thlir chuan Dortmund leh Leipzig te hi Frankfurt chung daiha awm an ni a, Rangers tan inrintawkna neihna tham a tling.

Tehfung dang
Final khelhna tur hmun Seville hi a lum ang reng a, 26C a ni phak avangin khawvawta inkhel ṭhin tan chuan beih tham a tling. Glasgow hi 16C bawr vel a ni a, degree 10 velin a inthlau. Frankfurt khaw lum dan hi Seville leh Glasgow inkar vel a ni a, German club hi lum tuar chak zawk tura ngaih an ni.

Chutihrualin khaw lum dan hi chu result ti danglam pha tur a ni lo a, inkhel nghawng ve thei chauh a ni. Thlirna dang lehah chuan team pahnih hi tlarhnung a phui tawk lo a, final-ah goal a luh ngei a rinawm.

Rangers hian match 14 an khelhah vawi thum chauh cleansheet an nei a, Eintracht Frankfurt-in match 12 aṭangin vawi hnih chauh cleansheet an nei bawk. Heti chunga final an thlen theihnna chhan chu goal an khung theih vang a ni a, final ti hmuhnawmtu tur a ni.

Inkhel tur chu
Frankfurt hian tun season Europa League-ah hneh loh an la tawng lo a, team boruak pawh a ṭha. German club tana Europa League-a goal khung tam ber chu Japanese midfielder Daichi Kamada a ni a, goal nga khung tawhin Serbian winger Filip Kostic-a'n goal thum a khung tawh bawk.

Tlarhnungah Germany international keeper Kevin Trapp a awm a, amaherawhchu defender pawimawh Martin Hinteregger a inhliam. Hinteregger inhliam hi Brazilian defender Tuta tan hming chherna remchang a ni thei ang.

Rangers ṭantute tan semifinal second leg-a RB Leipzig 3-1 a an hneh kha an hun tawn ropui zinga mi a ni dawn. Captain James Tavernier, Glen Kamara leh John Lundstram ten goal khat ṭheuh an khung a, Frankfurt lakah pawh heng player-te bawk hi tlarhnung leh tlarhmaah an pawimawh ang.

Player ṭha ber kan kawl em, coach ṭha ber kan ni em tih chu ka sawi thei lo. Mahse, team ang chuan kan danglam a, a ṭha ber kan ni thei a ni. Kan result avangin mi ṭhahnem tak an hlim thei a, chuvangin keini chuan final chauh kan ngaihtuah. - Oliver Glasner, Frankfurt manager

Kan hlawhtlinna hi ka lawm. Mi tlemte chauhin European final a khel thei a, player zawng zawng tan a ni lo. Final kan khel dawn ta bawk a, kan theihna zawng zawngin champion tumin kan khel ang.
- Giovanni van Bronckhorst, Rangers manager