Chelsea - an hralh thei lo mai thei!

Premier League club Chelsea chuan neitu thar an nei ngei dawn niin lang hman mah se, tun hnaiah thuthar a awm a, UK sorkar chuan London club hralhna tur hi a pawm lo mai thei.

American mi hausa Todd Boehly leh a thawhpuiten Chelsea hi lei turin inremna an neihpui tawh a, Blues lei nan hian pound tluklehdingawn 4.25 an theh chhuak tawh.

Mahse, club hralhtu leh a lei tur lam inrem tawh mah se UK sorkar leh Premier League lamin club hralhna hi an pawmpui ve a ngai a, UK sorkar chuan awlsam taka pawmpui mai an harsat ta tlat.

UK sorkar hian Chelsea neitu Roman Abramovich chuan a club hralhna aṭang hian hlawkna tel a tum niah an ngai a, hei vang hian minister tam takin Blues hralhna pawmpui hi an harsat.

A thlen dan
Russia sorkarin Ukraine a run a, hei hi khawvel ram tam zawkin an dem. Russia sorkar chet dan na taka dem zingah UK an langsar a, a theihna chin chinah Russia sorkar hi a hrek.

UK sorkar hian Russian president Vladimir Putin nena inhnimhnai nia a hriat, Russian sumdawng hausa engemaw zat a hrek a, chung zingah chuan Abramovich pawh a tel.

Abramovich hi UK huam chhunga a thil neihte khawih che thei lo tura hrek a ni a, Chelsea pawh hi special licence pein an kal thei hram hram a ni ber - hei vang hian Chelsea hralhna aṭang pawhin hlawkna a tel a rem lo.

Russian sumdawng hausa hian hei hi a hria a, Blues hralhna aṭanga hlawkna chu indona tuartute tan a thawh tur thu a sawi a, club-in loan an puksak pawh rulh ngai a ti lo. Mahse, hei tak hi UK sorkar chuan rinngam harsa an ti.

Engati maw?
Abramovich berin Chelsea hralhna aṭanga hlawkna a tel loh tur thu a sawi a, loan pawh rulh a ngaih loh thu a sawi - Chelsea-in loan an puksak hi pound tluklehdingawn 1.6 a ni.

Chelsea hralh a nih dawn takah chuan loan an lak dan hi enchian a ni a, Blues hian anmahni company tho Fordstam Ltd. kaltlangin loan hi an puk a, loan an pukna hi Camberley International Investments a ni.

A sum lakluh dan thianghlim tawk loa sawi, Russian mi hausa Abramovich hian Camberley International Investments nen hian inzawmna an nei a, ama hming lang miah si loin hemi kaltlang hian hlawkna a tel daih thei.

UK sorkar chuan Abramovich leh Chelsea chuan loan hi rul anga kaltir a, midang puihna tur charitable foundation-a a luh hmaa dan chah daih an tum niin an sawi.

Rinhlelhna
BBC-in an tarlan dan chuan, UK sorkara mi pawimawh tak pakhat, a hming tarlan loh chuan minister hoten Chelsea an ringhlel tih sawiin, "Club hralhna aṭanga hlawkna kalna tur hi chiang taka hriat an duh a, thil ṭha tih nan sumte hi hman a nih tur thu sawi ni mah se, an thusawi hi dan ang takin an thlawp tel thei em, tih hriat an duh a ni," a ti.

Mahse, Abramovich-a'n vantlang hriatah club hralhna aṭanga hlawkna a tel loh tur thu sawi mah se sorkar phut ang a, dan ang thlapa intiam a ngam lo nia sawi a ni - hei tak hi UK sorkar tan buaina a ni.

BBC thulakna pakhat chuan, "Club hralhna aṭanga sum ṭhenkhat hi a nih loh dan tur angin kal ta se, dan bawhchhiatna a ni dawn a, hei hi UK sorkara minister tam takin pawm harsa an ti," tiin a sawi.

UK sorkar hian Chelsea hralhna an pawmpui theihna turin London club hnenah hian rawtna an nei - club hralhna sum chu escrow account (indawrnaa tel lo, inbiak fel hmaa sum lo enkawl tur) ah awm phawt se, charitable foundation a inpeih ta maw tihah pekchhuah phawt ni se, tih a ni a, Abramovich hlawk loh an duh ber!

Rem lo ta se...
Chelsea hi May 31-ah sorkarin special licence a neih chu a tawp tawh dawn a, Premier League chuan June thlatirah club-te licence a pe chhuak ṭhin bawk - Blues hian hun an nei tlem ta hle.

London club hian hun tiam chhungin an inhralhna hi an tifel hman lo a nih chuan administration-a dah theih an ni dawn a, June-ah licence an tihfel hman loh chuan Premier League leh European football an khel thei lo bawk ang.

Thil thleng thei zawng zawng thlir hian Chelsea tan a rang lama buaina hi chinfel a ngai tihna a ni a, Abramovich-a tan pawh sorkar phut anga dan ang taka chet vat a ngai dawn tih a lang - a ti duh ang em, tih chu zawhna a ni.

Chelsea aiawh hian club chairman Bruce Buck leh club director Marina Granovskaia te chuan sorkar hotute hi an dawr mek a, Blues fan-ten an inbiakna 'result' hriat thuai an châk.

An hlauthawng lo
Premier League leh Chelsea indawr boruak karah Blues neitu thar Boehly leh a thawhpuite erawh an hlauthawng hran lo a, Boehly-te lamhnai pakhat chuan, "Chelsea neitu nih a, English football hlawhtlinna tura tha thawh hi an duh ber chu a ni.

"Boehly leh a thawhpuite hian an ruahmanna Chelsea-in an lo pawmpui chu lawmawm an ti a, football thuneitu leh sorkar hotute nena an inbiaknaah pawh an lawm hle.

"Chelsea hralhna aṭanga sum kal hi chu a hralhtu leh sorkar lam chinfel tur a ni," a ti a, Blues leh sorkar buainaah inrawlh an tum lo.

Hetihlai hian Abramovich thu-puangtu chuan, "Thil thlen dan kan ngaihtuah hran lo a, club hi hralh a nih ngei kan beisei. Roman Abramovich hian a club hralhna aṭanga hlawkna tel a tum reng reng lo," tiin a sawi ve bawk.