Spurs tan Alli leh Moura-te inpeih

Premier League-ah Champions league khelhna inchuh boruak a sang chho a, zanin match hnih awm turah pawh Europe beisei pahnih Leicester City leh Tottenham Hotspur te an inlan dawn.

Zanin dar 10:30-ah Leicester City-in Brighton & Hove Albion an mikhual ang a, zan dar 12:45-ah Spurs-in West Ham United an mikhual bawk ang.

Tottenham-in an match hnuhnung berah 1-1 in Manchester United an inhnehtawkpui a, inkhelh banah Spurs boss Jose Mourinho chuan an squad chhah tawk loh an tuar thu a sawi. United nen hian Dele Alli chu hrem vangin a inlan lo a, Lucas Moura erawh hliam vang a ni thung. West Ham nen an inkhelh hunah Alli hi bul ṭan thei tura ngaih a ni a, Moura pawh bench-a awm turah a ngaih theih.

Covid-19 vanga chawlhin hun tam tak a lak hek avangin Premier League match a zawn chho a, squad neih chhah a pawimawh. Subsitution panga hman theih a ni a, Mourinho erawhin pahnih chauh a thlak. Alli leh Moura te chhawr theih tura an awm takah chuan player tam zawk a thlak thei ang.

Alli hian tun season Premier League-ah goal riat a khung tawh a, Mourinho awm hnuah hma a sawn. Moura hian league-ah goal li chauh a la khung a, season liam taa goal 10 a khung nen chuan a la inthlau hle. United nen an inkhelh ṭumin Harry Kane leh Son Heung-min ten goal an khung a, West Ham nen erawh kim zawkin an inlan dawn a, Steven Bergwijn a chet ṭhat bawk avangin Hammers tlarhnung tan an huphurhawm khawp ang.

West Ham hian an match hnuhnung berah Wolverhampton Wanderers an hneh lo a, relegation zone-a awm Bournemouth nen point 27 ve ve an hmuh avangin Spurs lakah point hlawhchhuah ngei a ṭul dawn.

Leicester City-in point 54 an hmu tawh a, match riat khelh tur la awmah Champions League khel turin point 17 an la mamawh a, a lam tam tham viau mai. Foxes hi an match hnuhnung berah Watford nen an inhnehtawk a, hei hian hmabak awl ai lo zia a pholang.

Zanina Leicester hmachhawn tur Brighton & Hove Albion hian Arsenal an lehthal a, Gunners hneh theitu Seagulls hi an tlarhnung a phui ṭha. Foxes tan hnehna chang turin goal a pawimawh a, Jamie Vardy-a'n a goal khung theihna 'boot' a bun a ṭul dawn a, James Maddison, Harvey Barnes leh Marc Albrighton ten jersey number 9 hi an thlawp ṭhat a ṭul dawn a ni.

Tottenham hian Jose Mou­rinho hnuaiah eng nge an thlen dawn a la hriat loh a, Portuguese manager sulhnu erawh en theihin a awm.

Benfica (2000): Mourinho hian amah pui turin Benfica defender hlui Carlos Mozer a thlang a, result pawh an nei ṭha chho hle. December thlaah an elpui Sporting 3-0 in an hneh a, club president thar Manuel Vilarinho an nei bawk. 

Portuguese manager hian contract pawhsei a ngiat a, amaherawhchu Vilarinho hian manager turin Benfica player hlui Toni a duh avangin a pawhsei sak lo. Pa thu duh tak Mourinho hian banna a thehlut nghal a, Vilarinho hian manager ṭha an chan hi tun hnuah a inchhir thu a sawi.

Uniao de Leiria (2001-2002): Mourinho hian Uniao de Leiria hi July 2001 aṭangin a enkawl ṭan a, January 2002-ah FC Porto a pan san. Portuguese club hi an san lai berin pathumna an ni a, Mourinho-a'n a chhuahsan dawn lai hian palina niin club lian zawk Porto aiin point khatin an sang a, Benfica point khatin an pha lo.

Porto (2002 - 2004): Porto-in January 23, 2002-ah Mourinho an lalut a, panganaah an awm. Portuguese manager hnuaiah match 15 aṭangin match 11-ah an chak a, pathumna an nih pui bakah season thara champion a tiam. 

Mourinho-a'n a sawi lawk ang ngeiin Primeira Liga-ah a cham­pion a, Taca de Portugal-ah a club hlui Leiria hnehin an champion a, UEFA Cup final-ah Celtic hnehin Europe-ah a champion pui bawk.

2003-04 season-ah Mourinho kaihhruaina hnuaiah Porto-in hneh takin Primeira Liga an chawi nawn a, Taca de Portugal final-ah Benfica lakah vanduai mah se UEFA Champions League-ah Monaco hnehin an champion.

Chelsea (2004 - 2007): Porto aṭangin khawvelin a hmelhriat a, Chelsea a luh meuh chuan 'The Special One' tiin a inchhal tawh. Sir Alex Ferguson leh Arsene Wenger te ropuina hmunah inkiltawihna reng a nei lo. 

Mourinho hian London club hi Premier League-ah season zawnin 2004-05 leh 2005-06 khan a champion pui nghal a, 2006-07 season-ah erawh Manchester Untied tluk lo mah se pahnihna dinhmun an luah bakah FA Cup-ah an champion. 2007-08 season-ah Mourinho leh club neitu Roman Abramovich inkar khi a keh ta nge nge a, September 20, 2007-ah London club a chhuahsan.

Inter Milan (2008- 2010): A kalna apiangah Mourinho a hlawhtling zel, Inter Milan-ah kalin season khatnaah Serie A champion a nihpui nghal. 2009-10 season-ah record ṭha zawk neiin Serie A, Champions League leh Coppa Italia-ah a champion vek a, Inter Milan hi treble champion-a nihpui.

Real Madrid (2010-2013): Portugal, England leh Italy-ah league nomawi a chawi hnuin Real Madrid a zawm a, La Liga-ah pahnihna ni mah se Copa del Rey-ah a champion nghal. 2011-12 season-ah La Liga nomawi a chawi a, Europe ram paliah league nomawi a chawi. Amah­erawhchu Real-a Mourinho hunlai hi Barcelona vanglai a ni a, La Liga nomawi vawi khat chiah a chawi a, Champions League-ah a champion lo bawk.

Chelsea (2013-15): Kum 2013-ah Mourinho-a'n Chelsea bawk a pan a, season khatnaah nomawi an chawi lo. 2014-15 season-ah erawh Mourinho-a'n nomawi a keng tel tih a rawn pholang leh a, Premier League leh League Cup-ah a champion pui. 

2015-16 season-ah erawh Mourinho a ṭawng tam hret a, ṭul lo taka team doctor Eva Caneiro a sawisel hnuah an result a ṭha lo zui a, November thlaah 14-naah awmin Portuguese manager hian London club a chhuahsan.

Sir Alex Ferguson awm loh hnua league nomawi chawi tawh lo Man United-in beiseina sang tak nen Mourinho an la lut a, Premier League-ah parukna chauh ni pui mah se League Cup leh Europa League-ah a champion pui. Season hnihnaah erawh nomawi a chawi lo a, Premier League-ah Manchester City chiah an tluk lo. 

Chutihrualin Pep Guardiola enkawl Man City an phak lohna a nasat avangin league nomawi chawi mai thei hmel an pu lo a, 2018-19 season-ah phei chuan Mourinho-a'n vuina tur a hre tam lehzual a, December 18-ah result ṭha neih loh avangin Old Trafford a chhuahsan.

Tottenham Hotspur (2019 - ): Tottenham Hotspur-in Mauricio Pochettino hnuaiah Champions League final an thlen avangin beiseina sang tak an nei a, amah­erawhchu Poch-a hote tan erawh an chunga beiseina sang tak chu phurrit a tling. League match 12 aṭangin vawi thum chauh an chak a, League Cup-ah Colchester United an hneh loh bawk avangin Argentine manager an ban a, Mourinho an lalut.

Mourinho hnuaiah match 18 khel tawhin match riatah hnehna an chang a, tun season bika Poch-a record nena thlir chuan hmasawnna awm mah se kum hmasa lam nena teh nen chuan fak chiam tur a la ni lo. Spurs hian match li chhung chak hmel an hmu tawh lo a, Mourinho hian season tawpah Spurs hi eng dinhmun nge a thlenpui ang tih chu hunin a hril ang.