Huddersfield-in Championship playoff final khel dawn

Premier League ngainatu zingah Huddersfield Town hming a mikhual lo - season tharah English top flight league-a lo kir turin vawi khat chak chiah an mamawh ta.

Huddersfield Town hian Thawhṭanni zan khan an mikhual Luton Town chu 1-0 in an hneh a, inkhel hmasa nen belhkhawmin 2-1 in hnehna an chang a, final an lut.

John Smith's Stadium-a inkhelah mualneitu team tan Jordan Rhodes chuan inkhela goal awmchhun a khung a, Luton-in a chhanletna tur an neih loh avangin season tharah Championship an khelh chhunzawm dawn tih a chiang.

Nizan khan Championship playoff semifinal second leg inkhel dangah Nottingham Forest leh Sheffield United an inkhel a, he thu buatsaih a nih lai hian an result kan hre hman lo.

Luton an vanduai
Huddersfield khelmualah mikhual team Luton an tlangnel a, zakzum taka awm an tum lo - mahse, first half-ah inkhel an thunun chungin Luton hian goal an khung thei lo a, a tawpah an tuar.

Luton tan hian forward Harry Cornick chuan chance duhawm a nei a, mahse, hnai set sawt aṭangin Terriers (Huddersfield sawina) goalkeeper Lee Nicholls zawnah tak a pet!

Kum 27 mi Cornick hian second half-ah pawh chance duhawm a nei a, mahse, a vanneih zan a ni lo - Nicholls bawkin a dang a, game a thlir let chuan a hun ṭha neih a chhawr lohte hi a ui vawng vawng ang.

Luton hian vawi 13 zet shot an nei a, chung zinga paruk chu goal zawnah a kal - mahse, a pawimawh ber goal an khung thei miau lo a, Premier League khel turin season khat dang chu an nghah leh phawt a ngai dawn.

A tawpah Rhodes
Mualneitu Huddersfield hi second half-ah an insiamṭha a, an vanneih zan ni se penalty pawh hmu tur an ni - mahse, Hatters (Luton sawina) goalkeeper Matt Ingram-a'n chiang taka Harry Toffolo a titlu chungin penalty a chawi lo a, referee thutlukna a mak.

Hun tawp nan minute riat chiah a awm tawh a, extra time khelh ngei a ngai dawn niin a lang hman. Mahse, bench aṭanga luhtir Rhodes-a'n ngaihdan dang a nei a, minute 30 dang khelh belh ṭul a ti lo.

Rhodes ang thoa bench aṭanga luhtir Sorba Thomas chuan minute 82-naah freekick a thlawh lut a, hei hi Rhodes chuan amah vengtu defender Amari'i Bell laka tal put chungin a tlawh goal.

Luton tan khualmuala si phurh sut turin hun a tam tawk tawh lo a, hun tawp thlenga goal dang lut tawh loin Huddersfield an tlang.

Thawnthu ngaihnawm
Premier League 2017-18 leh 2018-19 season lo khel tawh Huddersfield-in "infiamna khawvela sum tamna ber," an ti ṭhin, Championship playoff final an inpetkai a, an thawnthu hriatchianin a ngaihnawm lehzual.

Semifinal-a hnehna an chan theih nana player pawimawh pathumte hi an chanchin a ngaihnawm hle - goalkeeper Nicholls-a'n season hmasa khan League One club MK Dons tan a khel a, league match sarih bak a khel lo.

Tun season ṭan dawnah free transfer-in league sang zawk club a zawm a, match 45 khelin season tluanin innghahna tlak a ni - Rhodes goal khung tur assist tu winger Thomas hian January 2021 khan non-league club Boreham Wood aṭangin Huddersfield hi a zawm a, tun season-ah assist vawi 15 a nei tawh!

Goal khungtu Rhodes-a'n Hudders-field tana a khelh hmasak (2009-2012) inkar khan match 148-ah goal 87 tehmeuh a khung a, mahse, season hmasa khan Sheffield Wednesday chu League One-ah tlakpuiin, tun hnai kum nga chhung a che chhe hle - nipuiah free transfer-in Huddersfield a zawm a, a hunah tak goal pawimawh bik a khung.

May 13, Zirtawpni Zan
Luton Town 1 - 1 Huddersfield Town
LUT: Sonny Bradley 30'
HUD: Danel Sinani 12'

May 14, Inrinni Zan
Sheffield United 1 - 2 Nottingham Forest
SHE: Sander Berge 90+1'
NOT: Jack Colback 10'; Brennan Johnson 71'

May 16, Thawhṭanni Zan
Huddersfield Town 1 - 0 Luton Town
HUD: Jordan Rhodes 82'
*Inkhel pahnih belhkhawmah 2-1 in Huddersfield an chak

Nizan Inkhel (Result kan hre hman lo)
Nottingham Forest 12:15 AM Sheffield United