Bale-a'n Real a chhuahsan dawn

Gareth Bale chuan kum 2013 khan pound maktaduai 80-in Real Madrid a zawm a, a hunlaia khawvela player man to ber a ni. Tun season tawpah Bale hian Spanish club hi a chhuahsan dawn a, a agent Jonathan Barnett chuan sum lam ni loin a khelh châkna a pan tur thu a sawi.

Barnett chuan, "Gareth Bale-a'n Real Madrid a chhuahsan dawn. English football-a a kir a rinawm ber. Mahse ka ngaihdan chuan a hmalam hun playoff-a Wales chet ṭhat danah a innghat," tiin a sawi. Wales hian World Cup playoff an la khel dawn a, Qatar khel tura an tling a nih chuan Bale hian team ṭha a pan a rinawm.

Bale hian Real Madrid tan match 256 a khel a, nomawi 18 zet lakpuiin chung zingah chuan Champions League nomawi pali a tel. Hei chauh hi a ni lo, Wales captain hian goal 106 tehmeuh a khungsak a, UCL final-ah goal li lai khungin assist vawi 67 a nei bawk.

Tottenham player hlui Bale hi a career tawp lamah Real Madrid-ah hmun pawimawh a chang pha lo a, a chet dan hmangin club nen an inkar boruak a ṭha lo tih a hriat theih bawk.

Amaherawhchu Bale hian Real-ah sulhnu ṭha tak a nei a, club legend Zinedine Zidane aiin nomawi a chawi tam bakah David Beckham aiin assist a ngah a, Brazil striker Ronaldo aiin goal a khung tam zawk.