Nigeria coach thar Peseiro

Porto leh Sporting Lisbon coach hlui Jose Peseiro chuan Nigeria coach ni turin Nigeria Football Federation chu inremna a neihpui a, May 28-a Mexico nen friendly match an khelh hunah Super Eagles hi a enkawl ṭan ang.

Kum 62 mi coach hian nikum August khan Venezuela a chhuahsan a, South American team-a a contract a tihtawp chhan hi an inrem anga hlawh an pek theih loh vang a ni.

Portuguese coach hian December khan Nigeria enkawl hi a lo rem ti tawh a, Africa Cup of Nations an khelh zawha enkawl turin inremna an lo nei tawh.

Mahse, February khan contract chungchangah bawk an inrem leh theih loh avangin Nigeria hi a zawm leh loh tur thu a sawi a, mahse, NFF president Amaju Pinnick nen an indawr leh hnuah a thutlukna hi sutin Nigeria hi a enkawl leh dawn si a ni.

Nigeria international hlui Finidi George chu Peseiro hnuaiah first assistant a ni ang a, Salisu Yusuf chuan second assistant hna thawkin Nigeria CHAN (an ram chhung footballer bik awmna) leh Under-23 team a enkawl bawk ang.

Peseiro-a'n a match hmasa bera Mexico a hmachhawn zawhah, June 2 khian New Jersey-ah Ecuador a hmachhawn leh dawn a ni.

Ecuador zawhah hian Africa Cup of Nations 2023 qualifier khel turin Sierra Leone chu entu awm loin June 9-ah an hmachhawn ang a, ni li hnuah Mauritius an hmachhawn leh bawk ang.

Nigeria hian tun hnaiah beisei ang result an nei thei lo - kumina khelh AFCON-ah last 16 aṭanga petchhuah an ni a, coach lailawk Augustine Eguavoen hnuaiah World Cup 2022 an inpetkai thei lo bawk.