Dybala leh Chiellini ten Juve an mangṭha

Giorgio Chiellini leh Paulo Dybala te chuan Allianz Stadium-ah Juventus jersey ha chunga an match hnuhnung ber an khel a, an club hi mittui nen an thlah - season tharah chuan Old Lady ni lo club dang tan an khel tawh ang.

Juve legend pahnih hian contract an hmang zo, an pawhsei loh avangin an duh zawng club an zawm thei dawn. Captain Chiellini hi kum 37 mi a ni tawh a, inkhelh la chawlhsan lo mah se league nem deuh zawk lamah a kal a rinawm.

Argentina forward Dybala erawh kum 28 mi chauh a la ni, vanglai hmang lai a nih avangin European club ṭha tam takin an hnena khel turin an la duh dawn. Premier League club ṭhenkhat nen pawh sawizawm mek a ni.

Allianz Stadium-ah Giorgio Chiellini hi a fate nen an thawk chhuak, inkhel bul ṭantu zingah tel mah se minute 18-naah an thlak. Minute 18-na khera an thlang hian chhan a nei, club tana a khelh hun chhung kum 18 hriatreng nana tih a ni.

Italian defender Chiellini chuan, "Ni lungchhiat thlak tak chu a ni," a ti a, khelmual a chhuahsan dawn hian captain armband chu amah ang bawka an thlah Dybala hnenah a hlan chhawng, stadium chhunga inkhel entu zingah a ruka mittui hru an tam.

Chiellini hian Juve tan inelna hrang hrangah match 560 a khel a, goal 36 a khung. A zawna Serie A nomawi vawi kua an chawi theih nan player pawimawh niin, league title bakah Copa Italia (5) leh Italian Super Cup (4) te a chawipui bawk.

Captain ropui a herliam aṭanga minute rei vak loah Dybala a liam ve zui. Dybala chhuak tur thlah nan Dusan Vlahovic chuan a goal lawm dan angin a lawmsak a, inkhelah hian Juve leh Lazio te 2-2 in an inhnehtawk a ni.

Juve manager Massimiliano Allegri-a'n hun tawp hma minute 12 la awmah Dybala a la chhuak, fans nen inmangṭhana hun ṭha nei se a duh vang a ni. 2015 aṭanga a awm tawhna Allianz Stadium chhuahsan hi harsa a ti hle.

Argentine forward hian Old Lady tan match 291 a khelh aṭangin goal 115 a khung a, ṭhiante khung tur vawi 48 siamsakin nomawi 12 zet a chawipui bawk. Khelmual chhung bakah pawn lama a larna leh hmelṭhat vangin fans a ngah a, mipui ngainat a hlawh bawk.

Allegri chuan, "Zanin zet chu thil lungchhiat thlak leh nguina tur lam hlir a ni. Chiellini leh Dybala te hi kan tan mi pawimawh bik an ni a, an sulhnute kan hrereng tawh ang," tiin an theihnghilh loh tur thu a sawi.