Delhi Capitals-in playoff beiseina chhi nung

Indian Premier League playoff inchuh boruak a nung zel. Thawhṭanni zan khan Delhi Capitals-in Punjab Kings chu 17 runs in an hneh a, match khat khelh tur la neiin playoff khel thei chinah an inhlangkai.

Navi Mumbai-a inkhelah Delhi-in an bat hmasa a, 159/7 runs an siam. Mitchel Marsh (63), Sarfaraz Khan (32) leh Lalit Yadav (24) te an che ṭha. Punjab Kings-in Delhi ang thoin chak an mamawh a, inkhelh hma hian team pahnih hian point 12 ve ve an hmu. Opener Jonny Bairstow (28) leh Shikhar Dhawan (19) te che chhe lo mah se an khel ṭha rual lo.

Jitesh Sharma (44) leh Rahul Chahar (25*) te che ṭhatna chuan result ṭha a thlen pha lo a, over 20-ah 142/9 runs chauh an tlin. Delhi hian table mawngphaha awm Mumbai Indians an la hmachhawn dawn a, Punjab Kings-in Hyderabad an la hmachhawn bawk ang.

League round hi tunkarah a tawp dawn a, Gujarat Titans chiah playoff khel tura an la tlin chian avangin boruak a la nung ṭha hle.