Mane hoin Reds an sen lar leh ta

Liverpool-in kum 2017 a league match nga chhung chak hmel an hmuh loh hnuah an chak ve ta - an mamawh chhanna chu Sadio Mane a ni. Africa Cup of Nations khela a thang bo hnuah Senegalese forward hian an chunga awm Tottenham Hotspur lamah goal hnih a khung a, an mikhual Spurs lakah Reds chu 2-0 in hnehna a chanpui.

Happy New Year!
Liverpool-in kum 2017 hnuah kumthar an lawm hleithei lo a, kumin chhungin vawi khat chiah hnehna an chang! Mahse, Mane a lo kir leh meuh chuan Liverpool tak tak kan hmu leh ta a, an khel a hmuhnawm takzet.

Africa Cup of Nations vanga Mane thangbo chhungin Liverpool hian match sarih zet an khel hman a, vawi khat chiah an chak. Hull City laka an tlawm ṭumin pound maktaduai 34 man winger hian ngai la awh lo mah se a chawlh hahdam hnuah ngai a awh leh tawh a, a tharum, tlan chakna leh thiamna hmangin Spurs tlarhnung a chaih phar.

Mane hian Georginio Wijnaldum hnen aṭanga a ball hmuh ṭha tak chu minute 16-na lekah a khung a, second 138 a liam hman chauh tihin an goal hnihna a khung nghal - Hugo Lloris-a'n a zawnin Adam Lallana leh Roberto Firmino dang mah se Mane erawh a dang zo lo. Premier League a hattrick siam rang ber ni tura May 2015-a minute hnih leh second 56 chhunga hattrick lo siam tawh forward hian goal thum khungna dang nei ṭha mah se a vawi thumnaah erawh French keeper Lloris a dingchang ve thung.

Spurs an chuai?
Tottenham boss Mauricio Pochettino-a'n Liverpool an hmachhawn hmain champion beiseina an la neih thu sawi mah se Reds hmaa an khelh danah erawh champion zia hmuh tur a awm lo. An league match hnuhnung pangaa goal hnih chiah chhuah team hian hliam vanga khel thei lo defender pahnih Danny Rose leh Jan Vertonghen an mamawh tih hai rual a ni lo a, tlarhmaah Harry Kane, Dele Alli leh Christian Eriksen te hmuh tur an vang hle.

Spurs hian Reds goal zawnah vawi hnih chiah an pet a, keeper Simon Mignolet-a'n South Korean forward Son Heung-min pet ṭha taka a dan sak tih loh chu goal hlauhawm an nei lo. Pochettino chuan inkhelh zawhah, "Kan khel chhia a, Liverpool kha team ṭha zawk an ni. Sawisel tur ka nei lo," tiin a sawi a, inkhel dinhmun a sawifiah chiang hle.

Manager thukhawchang
Liverpool manager Jurgen Klopp chuan, "Tottenham laka khelh dan tur diktakin kan khel a, result duhawm lo tak hnua kan thawh lehnghal avangin ka lawm a ni. First half-ah khan kan nawr na em em a, second half-ah kan goal kan venghim ṭha thung. First half-ah kha chuan Spurs khan min dan ngaihna an hre meuh lo. Penalty area-ah player pali emaw panga tal an awm reng ang a ni a, season chawhma lama kan khelh dan ang mai kha a ni," tiin a hlim hle.

Tottenham manager Mauricio Pochettino chuan, "Inkhel ṭantir lamah kan rilru kan pe tawk lo a, kan khelh dan kha hriatthiam harsa ka ti. Second half-ah kan insiamṭha a, mah se a tlai lutuk tawh a ni. Kan kutah engkim a innghat a, mah se zanina kan khelh dan anga kan khel zel dawn a nih chuan Premier League nomawi beisei ngam chi kan ni lo. Minute 45 chhung chu Premier League nomawi sual tura la inpeih tawk lo team in hmu a ni," tiin a naute khelh danah a lawm lo.