Arsenal leh Sanchez an tho

Alexis Sanchez-a goal hnih hmang­in Arsenal chuan an mikhual Hull City 2-0 in an hneh. Arsene Wenger-a naute hian point 50 hmuin Premier League table-ah pathumna an ni.

Emirates Stadium-a inkhelah Sanchez-a'n minute 34-naah goal hmahruai a khung a, a kuta a ben luh ni mah se eferee Mark Clattenburg leh assistant referee ten goal-ah an pawm!

FIFA World Cup final leh Champions League inkhel pawi­mawha referee ni phak Clattenburg-a'n hun tawp dawnah Sam Clucas chu hand ball vangin a hnawt chhuak a, penalty an chawi chu Chile international Sanchez-a'n tun season a league goal 17 nan a khung.

Arsenal hian Nilaini zanah Champions League last 16 first leg khel turin Bayern Munich khelmual Allianz Arena an pan leh dawn. Inkhel pawimawh an hmachhawn dawnah inbuatsaihna ṭha an nei tihna a ni.

Marco Silva kaihhruaina hnuai­ah Hull inkhelah hmasawnna hmuh tur a tam, table mawngphah lama takbuai mek ni mah se Manchetser United an draw hnuah Liverpool 2-0 in an hneh thei a, Gunners lakah pawh ball chang tam zawkin point an hlawh chhuak lo chu an vanduai vangah a ngaih theih.

Watford leh Chelsea an hneh loh hnuah Arsenal-in hnehna an chang ve leh ta a, manager Wenger chuan, "Kan ṭang rei thei a, kan tum a ruh bakah kan thawhhona a ṭha bawk. Hnehna chang turin kan thawk rim a, point thum kan hmuh avangin kan vannei ve bawk," a ti.

French manager hian season tawp­ah a chawl dawn niawma sawitu Ian Wright thusawi chhangin England leh Arsenal chu kum 20 chhung hna a lo thawh tawhna hmun a nih avangin a zah thu a sawi a, "He lai hmuna mipui hlimna siam hi ka tum ber a ni," tiin a hma lam hun a sawi chiang duh rih lo.

Hull manager Silva chuan, "Arsenal kan chhaih buai theih avangin kan khel ṭha tih a chiang a, hand ball hmanga goal an khung avangin kan chak lo. Kan khelh dan thlirin chak lo tur bik kan ni lo," tiin an vanduai thu a sawi.