Point 2000 hmu thei United

Manchester United chu Pre­mier League club zinga point 2000 hmu tling thei hmasa ber an ni! Jose Mourinho naute hian Inrinni zan khan Juan Mata leh Anthony Martial goal hmangin an mikhual Watford 2-0 in an hneh.

Man United hian point 2000 hmu turin match 949 an khelh aṭangin vawi 599 hnehna an chang a, an khingpuite nen ṭum 203 an inhnehtawk bawk. March 4 khian Bournemouth an mikhual dawn a, hnehna an chang a nih chuan Premier League match 600 hnehna chang thei hmasa ber an ni bawk ang.

Kum 1992/93 aṭanga Pre­mier League tih a nih hnuah team paruk chiah relegate lo a season tin la khel ziah thei an awm a, chung zinga pakhat chu United hi an ni. Point hmuh hnem lamah Arsenal (1797 points) chu pahnihna niin tun season hmahruai mektu Chelsea (1755) chu pathumna an ni bawk.

Manchester United manager Mourinho chuan, "Goal tam tak khung chi kan ni lo a, a pawi­mawh zawk chu goal chhuah loa khelh hi a ni," tiin a sawi. United hian tun hnaiah a zawnin league match 16 chhung hneh loh an tawng tawh lo.