Minerva-in Bengaluru FC an chelh Vawiinah I League champion an rawn thleng dawn
Sree Kanteerava Stadium-a Bengaluru FC vawi thum chak zawn tawh chu I League kai thar Punjab Minerva-in an tihtawp sak. Inrinni zan khan Blues tan captain Sunil Chhetri-a'n minute 53-naah hmahruaina goal a khung a, Punjab club tan Kamalpreet Singh-a'n minute 79-naah sutin 1-1 in inkhel a tawp.
I League champion lai Bengaluru hian season ṭan tir match hmasa pathuma Shillong Lajong, Chennai City leh Mumbai City an hneh tih loh chu chak hmel an hmu tawh lo. Khualmualah Blues hian East Bengal leh Churchill Brothers te an hneh lo a, Pune-ah DSK Shivajians an draw hram hnuah Minerva lakah point khat chauh an hlawh chhuak leh bawk.
Hmabak AFC
Spanish coach Alberto Roca Pujol-a kaihhruai Bengaluru FC hian February 15, Nilaini khian RG Stadium, Mualpuiah Aizawl FC an hmachhawn dawn. Vawiin hian Blues-in Aizawl an thleng ang a, Mizo paruk awm zingah defender Sena Ralte leh forward Lalhlimpuia te chu Mizo club hmachhawn turin an rawn zin ang.
I League champion Bengaluru leh Aizawl FC inkhel en man hi Rs 100 a ni dawn a, vawiin aṭangin zawrh chhuah a ni ang. Mizo club hian February 20, Thawhṭanniah hmahruai mektu East Bengal an mikhual leh zui ang..
Inkhel dang
Chennai City-in coach thar Soundararajan kaihhruaina hnuaiah an mual JN Stadium-ah hnehna an chang nghal a, Mumbai City 2-1 in an hneh.
Mikhual team-in Anderson da Silva (28') penalty hmangin hma hruai mah se Chennai hian Dhanapal Ganesh (29') tauh luh leh Charles de Souza (69') goal ropui hmangin an lehthal. Santosh Kashyap-a hote hi vawi ruk a zawnin an chak tawh lo.
A zawna vawi li chak tawh Shillong Lajong an chak lo. Mikhual DSK Shivajiyan chu Inrinni khan Shillong-ah 2-1 in an chak a; season hmasa aṭanga I League khel ṭan team hi khualmuala an chak vawi khatna a ni.
Lajong tan Aser Dipanda Dicka-a'n (33') goal khung chhunzawm mah se DSK Shivajians-in Sanju Pradhan (16') leh Shane Charles Alan Mc Faul (44') te goal hmangin 2-1 in hnehna an chang. Thangboi Singto hote a zawna vawi li an chak hnuah Pune club an hneh ta lo.
Aizawl FC Vs Bengaluru FC
@Rajiv Gandhi Stadium
February 15, Nilaini - 2:05 PM
Ticket lei theihna
1. Aizawl FC Merchandising Centre
2. Raw Digital, Near Vanglaini Office, Zarkawt
3. Stalwart, Opposite Mission Veng Bus Stand
4. Din Din Pharmacy, Khatla Kawn
5. Emmanuel Store, Near Greenwood Hospital, Bawngkawn
6. Carz Spa, Millenium Centre, Motor Silna
7. David Security Solution, Near Zote Bakery, Chanmari