Kolkata Derby-ah chak zawk awm lo

Tun season I League Kolkata Derby hmasa berah East Bengal leh Mohun Bagan goal awm loin an inhnehtawk.

Pathianni zan inkhelah hian hero of the match-ah East Bengal keeper Rehenesh TP thlan a ni a, derby match-a goal khung hnem ber Bhaichung Bhutia-a'n chawimawina hi a hlan. East Bengal hian match riat khelhah point 20 hmuin hmahruaitu an ni chhunzawm a, Mariners hian match sarih khelhah point 17 hmuin pahnihnaah an awm ve bawk.

Jeje leh Didika

Mohun Bagan starting eleven-ah Jeje Lalpekhlua a langsar a, East Bengal tan Lalrindika Ralte-in captain armband a hreng bawk.

Sanjoy Sen-a'n Aizawl FC an hneh ṭuma inkhel bul ṭan lo player pali Brazilian defender Eduardo leh Haitian winger Sony Norde bakah Bengali midfielder pahnih Pronay Halder leh Souvik Chakraborty te chu inkhel bul ṭantu zingah a telh.

East Bengal-in match hmasa bera Aizawl FC an draw hnuah a zawnin an khingpui vawi ruk an hneh tawh. Kolkata Derby-ah coach Trevor Morgan-a'n match hnuhnung bera Chennai City an hneh ṭum aṭangin player pakhat chiah a thlak a, Goan midfielder ṭha Rowllin Borges aiah derby-a tawnhriat nei ṭha Mehtab Hossain a thlang.

An fimkhur

East Bengal tan home match a nih avangin Kanchenjunga Stadium khat tlata mipui pungkhawm zingah Red and Gold jersey ha an tam zawk a, attacking football erawh an khelh ngam phah chuang lo.

Mohun Bagan lamin chance ṭha nei ngah zawkin Jeje-a'n ding lam aṭanga a ball hmuh chu goal zawnah a pet thei lo a, Sony Norde corner pet chu keeper Rehenesh-a'n ṭha takin a dang bawk.

Mariners midfielder Souvik-a'n East Bengal defender pathum a bum hnuah a pet na tawk lo a, keeper Rehenesh-a ball man tawh chu Swansea striker hlui Darryl Duffy-a'n a pet lui. Captain a nihna anga mahni teammate-te chhan Mizo tlangval Didika'n yellow card a hmuh phah.

East Bengal tan midfielder Wedson Anselme-a'n ball a chang rei a, Haitian midfielder hi langsar mah se goal nawr kawngah a ṭangkai lo a. First half-ah goal a lut lo.

Derby hmuhnawm zawk

Second half ṭantirhah East Bengal forward palian Robin Singh-a ball tauh per chu Willis Plaza-a'n a um lut a, Trinidadian forward ball pet chu keeper Debjit Majumder-a'n ṭha takin a dang.

East Bengal goal nawr a na chhunzawm a, Mariners counter attack hmangin an hlauhawm vek bawk. Bagan captain Katsumi Yusa-a'n box chhungah Jeje pe loin goal-a pet a thlang a, Japanese midfielder hian duh a thlang sual. Khelmual chhunga langsar tawk lo Hnahthial tlangval hi minute 76-naah Balwant Singh-a'n a thlak zui bawk.

Hun tawp hmain Didika ball vawrh ṭha bik chu East Bengal midfielder Anselme-a'n a um lut a, Haitian midfielder hian ball hi a dawng fuh tawk lo. Mariners-in hun tawp lamah substitute Balwant hmangin an nawr a, Punjabi tlangvalin goal a khung bik loh avangin goal lut loin Kolkata Derby an ṭin.

Hmabak

Mohun Bagan-in February 15 khian Cooperage Stadium-ah Mumbai FC an tlawh dawn. East Bengal-in hemi ni vek hian Barasat Stadium-ah Shillong Lajong an mikhual ang.

Kolkata club lian East Bengal hian Lajong zawhah Mizoram an rawn tlawh dawn. February 20, Thawhṭanni khian Aizawl FC nen RG Stadium, Mualpuiah an inhmachhawn ang. Inkhel en man hi Rs 200 leh Rs 100 a ni dawn a, Bengaluru FC leh Aizawl FC inkhel en tan a hmunah ticket hi 50% a discount a ni ang.