Real leh Barcelona an chak
Spanish La Liga inum boruak a sang chho zel - Inrinni zan khan hmahruaitu Real Madrid chuan an mikhualna ramah 3-1 in Osasuna an sawp a, Barcelona chuan an nomawi beiseina chhi nung turin Alaves chu khualmualah 6-0 in an sawp bawk.
Real Madrid tan Cristiano Ronaldo-a'n tun season La Liga-a a goal 14-na a khung a, Lionel Messi-a'n a goal 17-na khungin goal hnih khungtu Luis Suarez chuan goal 18 a khung chiah bawk - nomawi inchuh boruak karah La Liga top scorer boruak pawh a sang hle.
Real tan Ronaldo
Inkhel ṭan aṭanga minute 24-na lekah Ronaldo chuan Real tan goal hmahruai a khung a, mah se mualneitu team tan Sergio Leon chuan minute 33-naah a sut. Real wing-back Danilo chu hliam vanga lakchhuah a nih hnuah Zinedine Zidane-a'n James Rodriguez luhtirin 3-5-2 aṭangin 4-3-3 ah formation an thlak a, Real an ṭha sawt.
Chawlhlawk hman a nih
aṭanga minute 62-naah Isco-a'n an goal hnihna a khung a, Lucas Vazquez chuan injury time-ah a chip lut bawk. Inkhel pumpui thlira player langsar erawh goalkeeper Keylor Navas a ni. Costa Rican keeper hian Fausto Tienza leh Newcastle aṭanga Osasuna tana loan-a khel mek forward Emmanuel Riviere te goal shot chu ṭha takin a dan sak a, goal khungtu Leon-a'n yard 20 vel aṭanga a pet a dan chu sawi hmaih theih a ni lo.
Osasuna tan PSG aṭanga loan a an hawh goalkeeper Salvatore Sirigu a che ṭha bawk a, Italian goalkeeper hian Karim Benzema goal khungna hun ṭha chu engmah lo maiah chantirin Ronaldo-a'n a goal hnihna khung tum mah se Portuguese forward hi hlawhchhamin a kir tir bawk.
Tano Bonnin a inhliam
Osasuna central defender Tano Bonnin chu Real Madrid attacking midfielder Isco nen ball an inchuhna lamah inhliamin a ke ruh a tliak. Kum 24-a upa Isco a inthiam thei lo a, Bonnin chu dam vat tura a duhsak thu a sawi. Isco chuan, "Ball inchuh pangngaia inchuh mai kan ni a, hetiang hi a thleng ta si. Na a tih avanga Tano ṭe ri kha ka la hre reng a, a hliam kha a rapthlak em avangin en pawh kan en ngam lo. Tano hi dam thuai se ka ti a, a inhliam hi pawi ka ti takzet a ni," a ti.
Real Madrid manager Zinedine Zidane chuan, "Tano hliam kha pawi ka ti takzet a, a dam thuai kan duhsak hle. Kan player inhliam Danilo pawh kan enfiah vat ang a, a dinhmun tur chu a chiang thuai ang," a ti a, La Liga mawngphaha awm mek Osasuna chu fak nghalin, "An khel ṭha takzet a, team pahnih inthlauhna zat ngaihtuah phei chuan a awihawm loh zawk a ni," tiin Osasuna chu khel ṭha a ti hle.
Goal khung thiam Barca
Barcelona-in Copa del Rey final a an hmachhawn tur Deportivo Alaves an lenchilh a, khualmualah goal ruk zet khungin Alaves tan inralrinna dar an vuak sak. Barca tan Suarez-a'n goal hmahruai a khung hnuah Neymar, Messi leh Ivan Rakitic ten an chhunzawm ve bawk a, Catalan club-in goal khung an harsat loh tehlul nen Alaves defender Alexis chuan goal khat a 'khilai' a, a hnu khartu chu hmahruaina goal khungtu Suarez tho a ni.
Luis Enrique-a enkawl team tana chanchin lawmawm lo erawh full-back Aleix Vidal chu hliam vangin zawn chhuah a ni a, kum 27-a upa defender hliam hi a ngalrekah niin tun season chhung a inlan tawh dawn lo. Barcelona chuan Sevilla aṭanga kum 2015-a an lakluh defender hi damdawi ina an kalpui hnuah thla nga tal a chawlh a ngaih tur thu an sawi.
Enrique thukhawchang
Barcelona coach Luis Enrique chuan, "Sawi tur leh enlet tur tam tak a awm a, ka lawmna ber chu kan khel ṭha em em mai kha a ni. Kan ruahman dan ang takin kan khel thei a, hmun awl kan insiam thei a ni," tiin a naute khelh danah a lawm hle.
Spanish manager chuan Vidal inhliam chungchang sawi nghalin, "Pawn lam aṭanga lo en mai pawh khan a hliam kha a na tih a lang chiang reng a, Barcelona tan channa nasa tak a ni. Vidal hi a dam thuai ka beisei a, a inhliam hi na viau mah se uluk taka enkawl a ni dawn a ni," tiin a player chu a dam thuai a beisei thu a sawi.
Inkhel Results
Espanyol 1 - 2 Real Sociedad
Real Betis 0 - 0 Valencia
Deportivo Alavés 0 - 6 Barcelona
Athletic Club 2 - 1 Deportivo La Coruna
Osasuna 1 - 3 Real Madrid