Monaco chakna Mbappe

Kylian Mbappe chuan French Ligue 1-ah a vawi khat nan hattrick siamin AS Monaco chu Metz lakah 5-0 in hneh­na a chanpui a, league hmahruaitu an nih chhun­zawm zel.

Inrinni zan inkhelah kum 18-a upa Mbappe-a'n (7', 20' leh 50')-ah te goal a khung a, goal hnih dang hi Manchester United leh Chelsea striker hlui Radamel Fal­cao khung a ni thung.

Kum 2005 khan khatih laia kum 17-a upa Jeremy Menez chuan Sochaux tan hattrick a lo siam tawh a, ani tih lohah chuan Chelsea leh Real Madrid tan pawha trial lo nei tawh Mbappe hi Ligue 1 match khata goal thum khung thei naupang ber a ni.

Monaco hian league match 25 khelh tawh aṭanga point 58 hmuin table-ah hmahruaitu an nih chhunzawm zel a, kum 2000 hnua a vawi khat nan league champion nih an beisei mek - an chung chiahah hian point 55 hmutu Paris St-Germain an awm thung.

Zirtawpni zan khan Paris St-Germain chuan khualmualah Bordeaux chu 3-0 in an lo va luh­chhuah tawh a, league nomawi an kawl lai hum­him ngei tumin hmalam an pan ve zel bawk.

A zawna season li chhung Ligue 1 champion ni thei PSG tan hian Edinson Cavani-a'n goal hnih khungin Angel di Maria chuan goal khat a thawh ve bawk.

Uruguay international striker Cavani hian French champion tan league match 120 a khelh aṭangin goal 78 a khung ta a, a club hmasa Napoli tana a khung zat nen a inang chiah - Italian club tan khan match 104 chauh a khel thung.

PSG hian Thawhlehni zanah Champions League last 16 first leg khel turin La Liga champion Barcelona chu Parc des Princes-ah an lo mikhual ang.