Thunder ngamtu Durant

Kevin Durant-a'n Gol­den State Warriors kawr a hak hnua a vawi khat nan Oklahoma City Thunder a len chilh a, American star hian a club hlui lakah zahngaihna a lantir lo - point 34 score in Golden State hi 130-114 in hnehna a chanpui.

Nimin zing Chesa­peake Energy Arena-a inkhelah Warriors tan Durant hi player langsar ber a ni a, auelna karah pawh a buai lo. Ani bakah hian Stephen Curry leh Klay Thompson te chuan point 26 ve ve score in an ṭangkai leh hle bawk. Golden State hian NBA regular season kal mekah match 46 hnehna an channa chiah a ni.

Thunder tan hian a dan pangngaiin Russell West­brook chu player

ṭangkai ber a ni leh a, court chhungah minute 37 hun a hman chhungin point 47 zet a score a, rebounds vawi 11 a lak bakah assists vawi riat a nei bawk. A thiante zingah amah thlawp ṭha bertu Victor Oladipo-a'n point 20 bak a score theih loh avangin a vawi 24 nan Thunder an chak lo.

Kum 28-a upa Durant chuan, "Inkhel nuam leh hlimawm tak a ni, mipui an bengchheng dawn tih kha chu ka ring lawk a, beisei ang ngeiin thil pawh a thleng. Hetiang inkhel danglam bikah hi chuan theihtawp chhuaha inkhel tawp mai hi a ṭha ber," tiin a club hlui a hmachhawn chungchang a sawi.

Western Conference hma­hruaitu Warriors hian Thawhlehni zing dar 7:30-ah Denver Nuggets an lenchilh leh dawn a, table-a pasarihna ni mek Thun­der hian dar 6:30-ah Wa­shington Wizards an hma­chhawn ve leh bawk ang.