Nadal leh Toni inṭhen dawn

Rafael Nadal-a coach leh a pate a ni bawk Toni Nadal chuan kumin bak chu court chhungah Spain tlangval hi enkawl zui a tum tawh loh thu a sawi!

Rafa-a'n tennis a luhchilh tirh aṭangin Toni hi mi pawimawh ber pakhat a ni a, a kaihhruaina hnuaiah Nadal hian Grand Slam nomawi 14 zet a chawi tawh. Mahse, kum 2014 French Open nomawi bak kha major title lak an la nei leh lo a, kumin Australian Open-ah beiseina an nei sang hle chungin Roger Federer an ngam lo.

Toni chuan, "Kumin bak chu Rafa hi a inkhelh­na hmunah ka zui tawh lo anga a, kan academy lamah nasa zawkin rilru ka seng tawh zawk ang. Ka fapa nen kan thawh­dun chhung hian engtiklai mahin kan inkar boruak a chhe ngai lo a, tun ṭum­ah pawh hian a la chhe chuang lo," tiin a sawi.

French Open nomawi vawi kua chawi tawh Nadal hian Spain-ah tennis zirna a hawng tawh a, a ṭhian hnai tak leh a coaching team zinga mi Carlos Moya pawh tunah hian a thawk mek.