July aṭangin inkhel entu awm dawn

France ramah chuan July 11 aṭangin stadium chhungah mipui 5,000 an punkhawm phal a ni tawh dawn. Football chauh ni loin infiamna peng dangah pawh a hmuna entu an awm thei dawn tihna a ni.

Coronavirus vangin French Ligue 1, Ligue 2 te chu April thla khan tihtawp a lo ni tawh. French Cup leh League Cup final khelh hmabak an neih chu a hmunah entu an awm theih hmel - nipuiah chuan pungkhawm thei zat pawh hi an tihpun a rinawm.

April thlatir lam khan French sorkar chuan September thla hma chuan an ramah infiamna kalpui a rem loh thu an tichhuak. Amaherawhchu beisei aiin hri leng hian ziaawm lam a pan chak a, tunah chuan thunun theih deuhthaw a nih tawh avangin a hmunah entu an awm thei dawn.

French sorkar chuan thuchhuah siamin, "Inkaihhruaina dan hi siam ṭhat leh ennawn zel a ni a, July thla laihawlah pawh en nawn leh a ni ang," tiin an ram dinhmun a zira an insiamrem zel tur thu an sawi.

Ligue 1 champion Paris St-Germain chian French Cup leh League Cup bakah Champions League quarterfinal chin khelh tur an la nei.