Chelsea sang fâl tur Burnley-in an chelh ding

Premier League hma­hruaitu Chelsea-in Pathianni zan khan Turf Moor-ah point khat chiah an hlawh chhuak a, Burnley nen 1-1 in an inhnehtawk.

Blues hian minute 7-na lekah Pedro goal hmangin hma an hruai. Burnley player manto ber Robbie Brady-a'n minute 24-naah freekick aṭangin Clarets si phurh sutin goal dang a luh belh tawh lo.

Antonio Conte hote hian league match 13 khelh tur la awmah point 60 an hmu tawh. Manchester City-in nizan khan Bournemouth an tlawh a, hnehna an chang a nih chuan Blues nena an inthlauhna hi point riat chiah a ni tawh ang.

Dyche-a game plan
Burnley manager Sean Dyche-a'n team lian zawk an bitum tih a chiang a, goal venhim hna thawh an hreh lo.

Winger pahnih Brady leh George Boyd ten Blues wing back te an ven uluk avangin Clarets hian 4-4-2 hmang mah se 6-2-2 ang hiala khelh chang an nghah hle.

Clarets hian Blues-in an thiam­puipa Eden Hazard an chhuah zalen a ni tih an hria a, Belgian midfielder hian Marcos Alonso a thlawp ṭhat tawk loh avangin Burnley-in Chelsea mual vei lam phui tawk lo chu nawr let nan an hmang.

Second half ṭan tirhah Cla­rets forward Ashley Barnes chuan Chelsea mual vei lam pawp hmang ṭang­kaiin Andre Gray tan ball ṭha a pe a, Blues de­fender David Luiz-a'n dang sual mah se Eng­lish forward hian a khung lo. Burnley hian goal khung belhna hun ṭha an nei a, Chelsea hi chak lo thei an ni.

Hei le, Brady
Burnley-in transfer tawp niah Norwich aṭangin pound maktaduai 13-in Republic of Ireland inter­national Brady an la lut. Brady hi Burnley player manto ber a ni.

Kum 25-a upa Brady hian Burn­ley tana inkhel bul a ṭan hmasak berah yard 26 aṭangin freekick a pet goal. Chelsea ma­na­ger Conte tan chuan Brady hi mangchhia a ni a, Euro 2016-ah khan group stage match hnuhnung berah Irish midfielder hian Conte enkawl Italy lamah chakna goal a tauh lut a, Republic of Ireland-in last 16 an luh phah bawk.

Burnley an ṭha
Burnley hi an mual Turf Moor-ah chuan team ṭha an ni a, Chelsea an hmachhawn hma hian match hnuhnung pangaah an chak a, heng zinga match hnuhnung paliah goal khat chiah an chhuah.

Mahni mual record chauh thlir chuan Clarets tluk loh chu Chelsea, Tottenham leh Arsenal te chauh an awm. Burnley hian point 30 an hlawhchhuah tawh aṭanga point 29 hi an muala an hmuh a ni a, Blues hian team ṭha tak lakah point hnih an hloh a ni.

Chesual thei Chelsea
Antonio Conte-a'n league cham­pion thei team ruk an la awm thu a sawi a, Italian manager hi a ṭawng fimkhur satliah ni loin thudik a sawiah a ngaih theih.

Chelsea hian Burn­ley an hma­chhawn hmaa Arsenal an sawp avangin champion chiang tawha ngaitu an tam, amaherawhchu Blues hian kuminah ringawt pawh point sarih an hloh tawh. Conte hote hian kuminah Tottenham an hneh loh tawh bakah Liverpool leh Burnley an draw a, chesual thei an ni tih a nemnghet.

Eng nge an sawi?
Burnley boss Sean Dyche chuan, "Team ṭha laka point hmuh hi result lawmawm tak a ni... ka beisei ang takin ka naute an khel a ni," tiin point hlawhchhuah an phu thu a sawi.

Chelsea manager Antonio Conte chuan, "Kan chak theih­na tur inkhela kan ngaih avangin kan result-ah kan lawm lo. Bul kan ṭan ṭha a, goal pawh kan khung hma a, kan lama freekick hmanga an rawn khung hnuah pawh chak thei tur kan ni. Tunah chuan a bul aṭanga ṭan ṭhat leh ṭul a ni," tiin rang taka insiamṭhat an mamawh thu a sawi.

Mind Game
Season tawp lamah coach rilru huaisen a hriat ṭhin a, Manchester United manager Jose Mourinho pawhin Chelsea tihbuai tumin, "Chelsea hian goal venhim hna an khel a, counter attack-ah goal an khung tho avangin um phak theih an ni tawh lo," tiin a sawi zauh.

Chelsea boss Conte chuan, "A thil tum hi ka hria a, hetiang hrethiam tur hian tawnhriat ka ngah ve tawk tawh. Kei chuan coach puite chhan let hi ka tum lo," tiin Chelsea champion tawh anga sawi vanga an buaqi loh thu a sawi.