MSL4 khel tur Republic VR4

Nimin tlai khan MSL Board-in MBBA Division I champion Republic VR4-in Mizoram basketball inelna sang ber an khelh tur thu an puang a; Champhai champion Minikins Basketball Club inhnuhdawh vang a nih thu an tarlang tel bawk.

Ruahmanna hmasa

MSL Board-in rua­hmanna a siam dan chuan MSL4 Qualifier-ah MBBA Division I champion Republic VR4 leh finalist Dawrpui Vengthar SC (DVSC) bakah Champhai champion Minikins te hmun ruak pakhat inchuh tur an ni a, a sang berin MSL4 an khel ang.

Inkhelh kuala pa­hnihna chu March 21 aṭanga khelh ṭan tur MSL3-a pangana nen playoff khel tura tih an ni bawk.

Inkhel leh buaina

Qualifier match hmasa ber February 9 zana khelhah Champhai champion Minikins-in 76-72 in Republic VR4 an hneh.

Aizawl khaw club VR4 leh DVSC ten Champhai club-in an player ziahluh danah document fel tawk lo a awm tiin MBBA technical committee-ah an thehlut a, Minikins hi disqualify zui an ni.

MSL Board-in Minikins hremna chungchang hi uluk takin a ngaihtuah a, appeal-na hun a siam­sak. VR4 leh DVSC lehkha thehluh leh, Minikins lam insawifiahna hi MSL Board chuan a ngaihtuah.

MSL thuneitu sang ber chuan, "Tuna MSL4 Qualfier khelh mekah thil felhlel a awm avangin qualifying hi a bul aṭanga khelh ṭhat nise," tiin a rel ta a - Champhai club-in an pawm thei lo.

MSL Board chuan Champhai district aiawh an awm tak loah chuan kum hmasa lama an kalpui angin MBBA Division I champion Republic VR4 chu MSL khel turin an pawm. Pahnihna DVSC chu MSL4 Playoff khel tura tih an ni.

MSL Board thutluknaah Champhai Minikins an lungawi lo. Champhai champion chuan, "MSL Board chuan MSL4 Qualfier a kan buaina neih mek chingfel tur hian thuthlukna siam sa an nei a. An thuthlukna siam sa chu MSL Qualifier match khelh tawh leh ruahmanna awm tawh zawng zawng chu sut vek a, player ngai vekin a bul aṭanga engkim ṭan ṭhat leh tura tih a ni.

"He an ruahmanna hi VR4 leh Dawrpui Vengthar SC-te chuan lawm takin an pawm a, kei ni Champhai Minikins chuan kan match khelh tawha VR 4 chu 76-72 a kan hneh tawh avangin kan zahawmna humhimna atan pawm chiah kan ngai lo a, hei vang hian MSL thuthlukna hi kan pawm thei lo," tiin an inhnuhdawh chhan thu­chhuah an puang.

VR4 tlinna hi tun season lo awm tur ni loin MSL4 a ni a, hei hi kum 2018-ah khelh a ni ang.