I League champion-ah Mizo pahnih
Nimin chawhnu khan I League champion Bengaluru FC-in Aizawl an rawn thleng. Spanish coach Albert Roca-a'n Aizawl FC hmachhawn tura player 18 a rawn hruai zingah Mizo pahnih Sena Ralte leh Daniel Lalhlimpuia te an tel.
Blues coach Roca hian Barcelona leh Galatasary-ah assistant coach hna a thawk tawh a, Spanish manager hi khawvel player ṭha ber (?) Lionel Messi-a'n La Masia aṭanga first team a tel theih nana tha thawhtu zinga mi a ni. Roca hian Barcelona-ah kum 2003 aṭanga 2008 chhung khan Dutch manager Frank Rijkaard hnuaiah assistant manager hna a chelh a, hei vang hian Spanish manager hnuaia Bengaluru FC khel en a châkawm sawt ang.
Bengaluru FC hian February 15, Nilaini hian Aizawl FC an hmachhawn dawn a, India captain Sunil Chhetri, I League top scorer ni mek CK Vineeth leh player langsar Eugeneson Lyngdoh, Sandesh Jhingan leh Udanta Singh te an inlan ang.
Aizawl FC Vs Bengaluru FC
@Rajiv Gandhi Stadium
February 15, Nilaini - 2:05 PM
Ticket lei theihna
1. Aizawl FC Merchandising Centre
2. Raw Digital, Near Vanglaini Office, Zarkawt
3. Stalwart, Opposite Mission Veng Bus Stand
4. Din Din Pharmacy, Khatla Kawn
5. Emmanuel Store, Near Greenwood Hospital, Bawngkawn
6. Carz Spa, Millenium Centre, Motor Silna
7. David Security Solution, Near Zote Bakery, Chanmari