Barcelona mikhual turin PSG inpeih

Arab sum hmanga siam len Paris Saint Germain-in French Ligue 1 nomawi chauh an duh­khawp tawh lo a, Champions League champion nih an tum. France champion hian zanin dar 1:15 hian Parc des Princes, Paris-ah Barcelona an mikhual dawn - PSG hian hnehna chang tur chuan player leh coach bakah fan-te puihna an mamawh ang.

Nikum December thlaa last 16 inkhel tur an pawh hlim khan PSG president Nasser Al-Khelaifi chuan, "Barcelona nen kan intum leh dawn ta! Tun hnai season li chhungin vawi ruk kan inhmachhawn tawh a, Catalan club hi kan zah em em a, UEFA Champions League inkhel ngaihven hlawh tak hmachhawn tur hian kan fan-te pawh an inpeih ang," tiin a lo sawi tawh, president hian fan puihna an mamawh zia a hai lo.

Tun season Champions League group stage khelh zawh takah match ruk khelh aṭanga goal 10 khung thei Lionel Messi tluk an awm lo. Argentina captain hnaih ber chu goal ruk khungtu PSG thiampuipa Edinson Cavani a ni. Barcelona leh PSG inkhelah hian goal a lut tam a nih pawhin a mak lo ang.

PSG midfielder Lucas Moura chuan, "Tu team mah hi hneh theih loh an awm lo. Chutih rual­in kei chuan Barcelona hi champion tura rinkai ber ka ti lo thei lo. Khawvela team ṭha ber an nih avangin ka zah a ni," tiin Champions League vawi nga champion tawh Catalan club a dah sang hle.

Barca an chungnung

PSG hian kum 1994-95 Cham­pions League quarterfinal-ah khan inkhel pahnih belh­khawmah Barca hi 3-2 in an lo hneh tawh a, hei bak hi knockout stage-ah an la hneh ngai lo. 2014-15 season khan group khatah an awm dun a, anmahni khelmualah ve ve hnehna an chang thung.

Kum 2012-13 leh 2014-15 season khan Barcelona hian French champion hi an lo pet chhuak tawh a, an intawn hnuhnung pathumah hnehna an chang vek a, Catalan club hian goal kua khungin an lamah goal hnih bak a lut lo. PSG hian inelna hrang hrangah Barcelona an hmachhawn vawi kuaah clean sheet an nei miah lo - sulhnu hlui en chuan Barca an chungnung zawk.

MSN

Lionel Messi, Luis Suarez leh Neymar te hming tluka khingpuite vau zam nana ṭha hi tunlai khawvelah a awm kher lo ang. Barcelona hian kar tawp La Liga inkhelah Alaves 6-0 in an sawp a, Copa del Rey final-a an hmachhawn tur an sawisak ṭum hian 'MSN' an inlar.

Suarez-a'n goal hnih a khung bakah Messi leh Neymar ten goal khat ve ve an khung bawk. Luis Enrique naute hian goal nga an khung bakah an tlarhnung a phui ṭha a, PSG hmachhawn turin hetiang baka inbuatsaihna ṭha a awm thei chuang lo.

Group C hmahruaitu Barce­lona squad-ah hian France inter­national defender Jeremy Ma­thieu, Lucas Digne leh Samuel Umtiti te an awm, anni hi Paris-ah an mikhual lutuk lo ang. PSG tana season hnih lo khel tawh Lucas Digne chuan quar­terfinal lut tura rinkai zawk sawi lawk theih a nih loh thu a sawi.

Kum 23-a upa Digne chuan, "PSG hian coach thar an nei a, an kalphung ṭhenkhat an tidanglam bawk tih a hriat theih. Kum hnih chhung Paris-a ka awm chhung khan nomawi tam tak ka chawi a, player-te pawh ka hrechiang. Team ṭha pahnih inhmachhawn tur kan nih avangin chak zawk tur sawi thiam a har a, round sang zawk lut tur chuan inkhel pahnihah hnehna chan tum a pawimawh ang," a ti. Digne hian nikum July thla khan PSG aṭangin Barcelona hi a zawm.

France roreltu

Laurent Blanc kaihhruaaina hnuaiah PSG hian a zawnin season thum chhung chu league champion an ni a, an season hnuhnung pahniah phei chuan League 1 bakah French Cup leh League Cup te an chawi kawp bawk.

Tun hnaiah season li chhung chu Champions League quar­terfinal an lut vek a, mahse an paltlang lo vek thung. PSG neituten player lakluh nan sum an hman hnem ṭhin avangin Europe club lian dangte elphakah an in ngai a, a tuartu chu manager Blanc a ni.

French manager Blanc banin PSG hian a zawna season thum chhung Europa League champion thei Unai Emery an la lut. Sevilla manager hlui hian season tir lamah beisei phak lo deuh mah se an insiamṭha tawh.

Group A pahnihna PSG in­nghahna tur chu Edinson Cavani a ni leh dawn, Uruguay international striker hian inelna hrang hranga a match hnuhnung parukah goal a khung vek a, kar tawp khan Bordeaux lakah goal hnih khungin tun season-ah a club tan hian league-ah goal 25 a khung der tawh - Barcelona tlarhnung tana ven ngun ngai bik a ni dawn.

Napoli striker hlui Cavani bakah PSG hian Champions League final-a man of the match lo ni tawh Angel Di Maria an la nei bawk. Argentina international hian tun season-ah assists vawi 10 nei tawhin a match hnuhnung berah goal a khung bawk a, Barca hmachhawn turin inbuatsaihna a nei ṭha hle.