Dortmund fiahin an awm dawn
Bundesliga table hnuai bera awm Darmstadt lakah 2-1 a awm tlawm hnuin Borussia Dortmund manager Thomas Tuchel chuan hehna chan phu khawpin an khelh loh thu a sawi a, German club hian zanin dar 1:15 hian Champions League last 16 first leg khel turin Benfica an lenchilh zui dawn - club tenau laka chak lo hlim Dortmund tan fiahna hautak a ni ang.
Club pahnihte hi tun hnaiah an inhmachhawn ngai lo, intawn tawhna sawi dawn chuan hmanlai sawi a ngai. 1963-64 season khan European Cup first round-ah an lo inkhel tawh a, German club hian an khelmualah 5-0 a hnehna an chan hnuin khualmuaah 2-1 in an chak lo thung.
Dortmund hi Group F hmahruaitu niin league round-ah chak loh nei loin Real Madrid an hneh thei a, an khingpui tur Benfica hi Group B-a pahnihna an ni thung. Napoli, Besiktas leh Dynamo Kiev te awmna group aṭanga inpet tling annih avangin group dang nena khaikhin ralah chuan an khawng lutuk lo maithei; chutih rualin Champions League last 16 lut thei zingah team nem an awm thei tak tak tawh lo.
Marco Reus-a'n tun season a Dortmund-in beisei an phak theih rih loh chhan chu an tlarhnung pawp vang nia a hriat thu a sawi, league match 20 khelh aṭangin goal 23 an chhuah tawh a, kaithar RB Leipzig (20goals) ai pawhin an chhuah hnem zawk. Defender rinrawl Mats Hummels a chhuah hnuah ngai an la awh lo tih a chiang. Tuchel-a naute hian hmasawn tur chuan goal ven kawngah intuai thar an mamawh.
Benfica hian German club lakah sulhnu chhuan tur an nei tam lo, vawi 42 an hmachhawn tawhah vawi 12 chiah hnehna an la chang a, vawi 14 chu inhnehtawkin ṭum 16 an chak lo. Hetih lai hian an khelmualah bik chuan vawi 20 an khelh aṭangin vawi hnih chiah chak loh neiin ṭum 10 an chak thung.
Dortmund hian Portuguese club an mikhual tawh zawng zawng an la hneh vek a, zaninah erawh khualmuala inkhel tur an ni. Vawi 10 an hmachhawn tawhah vawi sarih hneha changin ṭum thum an chak lo a, an chak lohna hmun hi Portugal-ah vek a ni.
UCL Last 16 Fixtures
FIRST LEG
Zanin Inkhel Tur
Benfica 1:15 AM Borussia Dortmund
PSG 1:15 AM Barcelona
February 15, Nilaini Zan
Real Madrid 1:15 AM Napoli
Bayern Munich 1:15 AM Arsenal
February 21, Thawhlehni Zan
Manchester City 1:15 AM Monaco
Bayer Leverkusen 1:15 AM Atletico Madrid
February 22, Nilaini Zan
Porto 1:15 AM Juventus
Sevilla 1:15 AM Leicester City
SECOND LEG
March 7, Thawhlehni Zan
Arsenal 1:15 AM Bayern Munich
Napoli 1:15 AM Real Madrid
March 8, Nilaini Zan
Borussia Dortmund 1:15 AM Benfica
Barcelona 1:15 AM PSG
March 14, Thawhlehni Zan
Juventus 1:15 AM Porto
Leicester City 1:15 AM Sevilla
March 15, Nilaini Zan
Monaco 1:15 AM Manchester City
Atletico Madrid 1:15 AM Bayer Leverkusen