Pacman-a'n twitter kaltlangin khingpui a zawng
WBO world welterweight champion Manny Pacquiao chuan twitter lamah a fan-te chu a khingpui tur thlang turin a ti. Division hrang pariata champion tawh boxer hian a khingpui ni thei tur hian British boxer pahnih Amir Khan leh Kell Brook, Australian boxer Jeff Horn leh American boxer Terence Crawford te hming a chhawp chhuak a, a inhnekna tur hmun chu UAE a nih thu a sawi bawk.
He chanchin buatsaih a nih lai thleng hian Pacman-a fan-te zingah Amir Khan chuan Filipino boxer hmachhawn tura duhtu ngah berin 47% a hmu a, Terence Crawford chuan vote 26% hmuin Kell Brook chuan 22% a hmu a, Pacquiao leh Jeff Horn inhnek hmuh châk an tlem ber a, kum 29-a upa boxer hian vote tla aṭangin 5% bak a hmu lo.
December khan Pacman hnek tura vote hmu tam pahnih Khan leh Brook hi inhnek an tum thu Brook-a promoter Eddie Hearn chuan a lo sawi tawh a, boxer pahnih hian ring chhunga an hmel an lan hnuhnung berah hnehna an chang zo lo ve ve thung. Kum 2015 khan Amir Khan hian Pacquiao chuan a hmachhawn ngam loh thu a lo sawi tawh. Pacman hian April 2016 khan Timothy Bradley a tukdawl hnuah inhnek a chawlhsan thu sawi mah se November 2016 khan lo kir lehin Jessie Vargas a hneh nghal a ni.