Sergio Aguero hmalam hun a chiang lo

Manchester City manager Pep Guar­diola-a'n season tawpa Sergio Aguero dinhmun tur a hriat loh thu a sawi.

Spanish manager Guardiola chuan, "Season tawpa thleng tur hi ka hre lawk thei bik lo. Goal khung thei bik striker lak harzia erawh ka hria. Châm zel turin ka duh a, sawi lawk theih erawh ka nei lo. Ka career chungchang pawh sawi ila, season tawpa thleng tur hi ka hre lo," tiin Argentine forward chungchang a sawi.

Kum 28-a upa Aguero hi match hnuhnung pahnihah bench-ah dah a ni a, Argentine forward aiah hian Gabriel Jesus chu thlan a ni. Nizan khan City-in Dean Court-ah Bournemouth an thlawh a, Aguero-a'n inkhel bul a ṭan nge ṭan lo tih kan hre hman lo.

February 5-a City-in Swansea 2-1 a an hneh ṭumin Aguero hi bench aṭangin a lut a, inkhelh banah Argentine forward chuan, "City tana khelh zel hi ka duh a, thla thum khelh tur la awmah hian theihtawp ka chhuah ang. Chumi zawhah chuan club-in ka tan hmun a awm leh awm loh chu an tichiang ang," tiin rinrawl ber nih a duh thu a sawi.

Hemi chungchang zawhna chhangin Guardiola chuan, "Chhuah a duh tihna lam a ni lo. Sergio hian manager leh club duh hi a hria a, hralh ka phal lo tih a hria a, chhuah a duh a nih loh chuan kan bula awm zel turin ka duh. Match hnuhnung pahniha bul a ṭan loh chhan chu Leroy (Sane), Gabriel (Jesus) leh Rash (Raheem Sterling) te khelh ṭhat vang a ni," tiin Aguero khelh loh chhan a sawi tel nghal bawk.

City hian nizana Bournemouth an hmachhawn zawh hian Inrinni zan hian FA Cup-ah Huddersfield an bitum dawn a, February 21 zanah Champions League-ah Monaco an mikhual bawk ang. Guardiola-a'n Argentine forward a chhawr dan azirin Aguero-a'n hma lam hunah thutlukna a siam ang.