Swansea ngam lo Foxes an hniam zel

Leicester City chuan Pa­thianni zan khan Premier League mawng lama an elpui Swansea City chu 0-2 in an ngam lo a, relegation zone aṭanga an himna chu point khat chiah a ni ta.

Inkhel ṭantir lam nung lo viau mah se minute 36-naah Alfie Mawson chuan Swansea tan hmahruaina goal mawi takin a volley lut a, first half hun pek belhah Martin Olsson chuan 'team goal' a khung bawk.

Leicester-in second half-ah tlawm zawk nih duh loin theih­tawp chhuah mah se substitute Islam Slimani pet ṭha zet chu Swansea keeper Lukasz Fabianski-a'n a thiam thil 'show' nan a lo hman sak a, an elpui lakah Foxes an tlawm.

Champion to relegate?

Leicester City-in kumina league match nga an khelh tawhah goal an la khung lo - English top four division club zinga kumin league match a goal la khung miah lo awmchhun an ni a, March 1956 a Chelsea hnua champion laiin match nga chhung a zawna tlawm hmel an hmuh hmasak ber an tawng bawk.

Foxes goalkeeper Kasper Schmei­chel-a'n Manchester United laka 3-0 a an tlawm ṭumin an dinhmun chu zahthlak leh hrehawm a tih thu sawi mah se Swansea lakah 'champion goalkeeper' a ni tih a hriat theih loh. Kum 30-a upa keeper tan Swansea goal hmasa zawkah tih theih awm lo mah se an goal hnihna erawh a tihsual vanga lut a ni thung.

Ranieri a beidawng?

Foxes-in chak hmel an hmu hleithei lo a, Claudio Ranieri chuan Premier League nomawi a chawipui player-te lakah a rinawm mah mah nia a inhriat thu hial a sawi chhuak ta! Foxes boss chuan, "Thil ropui tak in ti zo hlim a nih chuan i naute hnenah vawi khat, vawi hnih emaw vawi thum tal chance pek zel i duh a, mah se tunah chuan chance ka pe hnem mah mahin ka hre ta," a ti.

Italian manager chuan, "Pla­yer-te hi ka siksawi pawh a la ngai mai thei. Keimah ngei pawh hi zawhna ka inzawt fo ṭhin a, engemaw tak kan ti thei tih rinna ka neih avangin thutlukna ngai bawk ka siam leh ṭhin. Player-te nen kan titi apiangin kan dinhmun thlak turin kan inrintawk thu kan sawi ṭhin a, tunah chuan match tlemte chiah kan hmabak ta. Kan buaina laka tal chhuahna hi kan zawn vat a ngai a ni," tiin a sawi.

Ropuina hnuchhawnin...

Leicester City-in Premier League nomawi an chawina kawng­ah striker Jamie Vardy leh midfielder Riyad Mahrez an pawimawh takzet a, kuminah erawh players pahnih hi hmuh tur an vang ṭhin hle! Nipui laia Arsenal-in an rim Vardy hian season hmasa khan league-ah goal 24 a khung a, tun season-ah erawh goal nga chiah a la khung! Goal 17 khunga assist vawi 10 nei tawh Mahrez chuan goal thum chiah la khungin a ṭhiante tan assist vawi thum bak a la nei thei lo.

Ranieri chuan, "Mihring chakna ber chu balance dik a ni. Hnehna chanin pawr viau tur a ni lo a, tlawm pawn hnual em em tur a ni chuang lo. Season hmasa kan hlawhtlinna kha hriatreng a pawi hauh lo a, mah se chu champion zia chu kan chhuah tur a ni," tiin a naute chu an mumang ramah an la cham bang niah a ngai a, FA Cup leh Champions League-ah la dam mah se an ngaih pawimawh ber chu Premier League a him a nih thu a sawi bawk.

Clement harhna

Swansea-in coach thar Paul Clement an neih hnuah harhtharna an chang a, Bayern Munich assistant manager hlui hnuaiah hian league match ruk khelin vawi li hnehna an chang tawh! Clement hi Swans a enkawl thla January-ah Premier League manager of the month a thlan a ni nghal bawk.

Swansea City boss Paul Cle­ment chuan, "Ṭha takin inkhel bul kan ṭan a, ka naute khelh danah ka lawm a, chak kan phu a ni," tiin a naute khelh dan a fak.