Celta lehthaltu Atletico an chak

Fernando Torres chuan Pathianni zan khan Liverpool a 'Torres' kha min hmuhtir a, an mikhual Celta Vigo 3-2 a an hnehna inkhelah goal ropui bik a khung. Copa del Rey semifinal aṭanga tla hlim team pahnih inhmachhawn zanah Celta hian vawi hnih lai hma hruai mah se Atletico-in Torres, Yannick Carrasco leh Antoine Griezmann hmangin an chhanglet a, hnehna an chang - Torres hian goal ropui a khung hnu lawkah penalty a khung lo thung.

Inkhel chu

Atletico khelmualah mi­khual team-in goal an khung hmasa zawk a, Celta tan Gus­tavo Cabral chuan minute ngana lekah goal hmahruai khungin Vicente Calderon a reh ṭhup. Mahse, Atletico fans an ngawi rei lo. Goal an chhuah aṭangin minute ruk a liam hman chauh tihah Torres a inlar a, Celta goal lam pawh en loa a ball pet chu mawi takin a lut.

Torres-a'n goal ropui a khung hnuah a hmingṭhat belh­chhahna remchang a hmuh erawh a chhawr thei lo. Yannick Carrasco tih tluk a nih avanga an penalty hlawhchhuah chu Spanish striker hian goal-ah a chantir thei lo. Celta-in hmahruaina remchang bawhpelhtu Atletico hremna an pe a, John Guidetti chuan minute 78-naah an goal hnihna a khung.

Atletico an tho!

An goal hnihna an chhuah hnuah Atletico an harh zawk a, an khelmualah tlawm an duh lo. Minute 86-naah penalty hlawh chhuaktu Carrasco a inlar a, Belgian winger hian penalty area pawn aṭangin an si phurh sutna goal chu volley hmangin a khung - goal mawi huang chhunga dah luh ngam a ni.

Atletico an phur laklawh a, an si phurh sutna goal an khung avanga an hlim authawm pawh a reh fel hmain chakna goal an khung chhunzawm. Substitute Kevin Gameiro chuan Carrasco goal khung aṭangin minute hnih a liam hman chauh tihah Griezmann tan hnai set sawtah a tauh sak a, French forward hian tun season-a a goal 15-na ni turin a khung. Gameiro hian yard thum vel lek aṭangin bar a pet per bawk.

Penalty vanga buaina

Atletico-in chak lo tura an lan hnuah inlehthalna ropui lantir thei mah se Diego Simeone-a tan luhaina tur a awm a nih chuan penalty an pet goal thei lo hi a ni ang - Atletico hian an match hnuhnung pathumah penalty an hlawh chhuak vek a, an pet goal thei lo vek!

Leganes laka 2-0 a hnehna an chan ṭumin an player chhuanvawr Griezmann chuan an penalty hmuh goal-ah a chantir thei lo a, Barcelona nen Copa del Rey semifinal a penalty an hlawhchhuah ṭuma pettu Gameiro pawn goal-ah a chantir thei lo. Celta lakah goal khung tawh sa Torres duhsak a ni a, Atletico fapa rangkachak hian bar pet per nan bak a hmang thei lo.

Argentine manager Sime­one-a'n training naah a naute hi inzirbelhna tur a hrilh dawn a nih chuan penalty pet dan hi sawi hmaih thiang lo tur zinga mi a ni.

Simeone-a thukhawchang

Atletico-in Celta an hneh theih nan Carrasco a thawh­hlawk fal a, kum 23-a upa winger hian Torres goal khung tur a siamsak bakah an goal hnihna a khung a, a penalty hlawhchhuah Torres-a'n a pet goal lo bawk. Simeone chuan khel ṭha Carrasco hi fakin, "A thawkrim em em a, hmasawn ngei tumin theihtawp a chhuah a ni. Kan goal thum khung zingah khan a goal khung kha a nalh ber maiin ka hria," a ti.

Pathianni zan inkhelah Atletico fan-ten stadium an luah khat zo lo a, Simeone erawh a vui hran lo. Argentine manager chuan, "Pathianni zan a ni a, a vawt bawk si a, naktuk lawkah hnathawh tur tam takin a hmuak bawk nen fans an tam thei lo. Mahse, zanin kan inkhelah khan kan chak chhan chu fan-te an ni a, hun tawp hnaih thlengin min au phur a ni," tiin fan-te puihna vanga hnehna chang an nih thu a sawi.