Hun pawimawhah Leeds tawlhthlu

Premier League tihmuhnawm ṭhintu Leeds United chuan Pathianni zan Championship inkhelah Cardiff City 2-0 in an hneh lo a, pahnihna dinhmunah an luah.

Cardiff City Stadium-ah Junior Hoilett (35') leh Robert Glatzel (71') ten mualneitu tan an khung a, Leeds-in a chhanletna an nei lo. 

Covid-19 vanga inkhelh chawlh hmain Leeds hi league hmahruaitu an ni a, amaherawhchu inelna ṭan hnu match hmasa bera an chak loh nghal avangin champion lo thei dinhmunah an ding.

Leeds elpui West Brom pawh Inrinni zan khan Birmingham nen goal awm loin an inhnehtawk. Baggies leh Leeds hian point 71 ve ve an hmu a, goal difference nei ṭha zawk West Brom hi hmahruaitu an ni.

Championship-ah hian pakhatna leh pahnihna chu Premier League khel turin an tling nghal a, pathumna aṭanga parukna ten hmunruak pakhat an inchuh ṭhin.

Season liam ta khan Leeds United hi dinhmun ṭha taka an din hnuah an tawlhthlu. Tun season-ah hian match riat khelh tur la awmin Leeds hi anmahni hnaih bertu Fulham aiin point sarihin la sang mah se chesual thei 

an la ni.