I League champion inlan hun Tlai dar 2:05-ah Aizawl FC Vs Bengaluru FC
Bengaluru FC-in season liam ta khan I League champion turin Aizawl FC vawi hnih an hneh a, Mizo club hian Federation Cup-ah vawi hnih an hneh ve tho avangin club pahnih history-ah chungnung zawk an awm lo.
Vawiin tlai dar 2:05 hian RG Stadium, Mualpuiah Aizawl FC leh Bengaluru FC te hi an inkhel dawn a, Spanish coach Albert Roca hote hi match li chhung chak hmel hmu tawh lo an nih avangin Mizo club hi an chak a nih pawhin 'upset' a ni lo ang.
Intluk tawk
Aizawl FC-in RG Stadium, Mualpuiah nikum January 16 khan I League match hmasa berah Bengaluru FC an mikhual a, entu an ṭhahnem hle. English coach Ashley Westwood kaihhruai Blues-in 1-0 in Manuel Retamero hote an hneh. An vawi hnih inhmachhawnnaah erawh Spanish coach hi ban a ni tawh a, Bengali coach Jahar Das-a hote hi Bengaluru-in 1-0 bawkin an hneh. Hemi ṭuma goal awm chhun khungtu hi tuna Indian zinga I League-a goal khung hnem ber ni mek CK Vineeth a ni.
I League-ah Bengaluru FC an champion a, Federation Cup-ah erawh Aizawl FC nen pawh fuh niin champion zia an lantir thei lo. RG Stadium-ah Mizo club-in Joel Sunday leh tuna captain Alfred Kemah Jaryan te hmangin Bengaluru 2-1 in an hneh a, Blues tan Eugeneson Lyngdoh-a'n a khung ve bawk.
English coach Westwood ṭawng pawr viau mah se an mualah eng teh ual an ni lo a, Joel Sunday goal hnih leh David Lalrinmuana te goal hmangin Aizawl FC 3-2 in an chak a, Vineeth leh Sunil Chhetri te goal khungin awmzia a nei lo.
Bengaluru thar
I League-a champion puitu coach Ashley Westwood a bang a, Barcelona-a Dutch manager Frank Rijkaard thachhang dawltu Albert Roca an lalut.
Spanish manager hnuaiah Blues-in AFC Cup final an thleng a, I League-ah erawh beisei an pha lo. Bengaluru hian an muala match hmasa pathuma hnehna an chan hnuah match li aṭangin point hnih chauh an hlawh chhuak.
Harsatna belhchhah turin Middlesbrough defender hlui John Johnson leh Real Madrid B team tan pawha khel tawh Spanish defender Juanan te chu hrem vangin an rawn zin lo a, Honduran forward Roby Norales-a'n loan-in Ozone FC a zawm bawk. Foreigner zinga Aizawl FC hmachhawn thei awm chhun chu Australian midfielder Cameron Watson chiah a ni.
Blues-in buaina an tawh avangin team narana en chi an la ni lo a, Indian player ṭha rual an la awm khawm.
Bengaluru tlarhmaa awm captain Sunil Chhetri, CK Vineeth leh Udanta Singh te hi Mualpui panna tham an ni a, midfielder Eugeneson hi I League hlutna belhchhahtu niin defender Sandesh Jhingan hi Mizorama a vawi khat rawn kalna a ni a, India rama defender ṭha tehna atana hman tlak a ni ang.
Hei erawh hriat tel a ṭha bawk, Mizo pahnih Sena Ralte leh Daniel Lalhlimpuia te hi team tikimtu satliah an ni lo. North Mualcheng tlangval Sena hian inkhel bul a ṭan ngei a rinawm a, goal an mamawh a nih phawt chuan Serchhip rawlthar hian khelhna hmun a neih ngei rin a ni bawk.
AFC an dam
Aizawl FC midfielder Mahmoud Al Amna-a'n ngai la awh thlap lo mah se inkhel bul ṭan tur khawpin a dam tawh. Defender Lalruatthara hremna hlih a ni tawh a, Hmunhmel-ṭha tlangval hian inkhel bul a ṭan nghal ngei ang.
Aizawl FC-in RG Stadium-ah an khingpui an la hneh vek a, Bengaluru laka an record ṭha tak an chhawm nung thei a nih chuan table hmahruaitu East Bengal pawhin Mizo club hi an en liam thei tawh bik lo ang.
AFC coach Khalid Jamil chuan, "Bengaluru hian inhliam ngah mah se team ṭha tak an ni. An player-te hi tawnhriat nei ṭha vek an ni a, chuvangin fimkhur taka kan khelh a ṭul a ni," tiin an hmabak a awlsam loh tur thu a sawi.
Bengaluru coach Albert Roca chuan, "Aizawl FC hian an mualah an khingpui an la hneh vek a, tun hnaiah kan result a ṭhat loh bawk avangin kan tan a awlsam lo a, theih loh erawh a awm lo," tiin team ṭha zawkah a inchhal lo.
Hriattur pawimawh
Dengṭhuama Indoor Stadium-ah national level badminton tournament a awm avangin motor park dan tihdanglam a ni. LMV chin chu 3rd MAP Parade Ground-a park vek tur a ni a, Two Wheelers erawh kawng dungah remchang laiah park theih a ni ang. RG Stadium ko chhak lam aṭangin tlak a hlauhawm avangin tumah chhoh phal a ni tawh dawn lo bawk.
AFC hmachhawn tur BFC
Goalkeeper
1 Amrinder Singh
26 Arindam Bhattacharja
Defender
24 Salam Ranjan Singh
15 Sandesh Jhingan
19 Sena Ralte
22 Nishu Kumar
5 Keegan Pereira
Midfielder
17 Cameron Watson
8 Lenny Rodrigues
14 Eugeneson Lyngdoh
10 Harmanjot Singh Khabra
20 Alwyn George
37 Mandar Rao Dessai
Forward
11 Sunil Chhetri
31 CK Vineeth
25 Daniel Lalhlimpuia
7 Seiminlen Doungel
21 Udanta Singh