I League club lian inlan dawn
Aizawl FC-in Bengaluru an mikhual niah champion tum East Bengal leh Mohun Bagan te pawh an inlan dawn. East Bengal hian Shillong Lajong chu vawiin tlai dar 4:35 hian an mikhual dawn a, Kolkata derby a an inhnehtawkpui Mohun Bagan chuan Mumbai FC khualmualah an lenchilh thung dawn a, zan dar 7:05 hian an inkhel ang.
East Bengal hian derby-ah striker thar Chris Payne an la chhawr thei lo a, Australian striker hi Lajong mikhual tur squad-ah erawh telh a ni thung. Kum 26-a upa striker hi A League club Sydney FC leh Newcastle Jets tan pawha lo khel tawh a nih avangin Trinidad and Tobago international Willis Plaza leh Haitian forward Wedson Anselme nei tawh sa East Bengal an ṭhat belh sawt dawn.
Mizo 10 awmna DSK Shivajians chuan kaithar Minerva Punjab chu zan dar 7:05-ah tho an lenchilh dawn a, DSK hi khualmuala Shillong Lajong hneh hlim an nih laiin Minerva hi Mumbai an hneh hnua Bengaluru inhnehtawkpui an nih avangin an phur vanglai tak a ni.