Manchester City-in Chelsea an hnaih

Manchester City-in Thawhṭan­ni zanah Bournemouth 2-0 in an hneh a, Pep Guardiola hoten hmahruaitu Chelsea an phak lohna chu point riat chiah an ni ta.

Vitality Stadium-ah City tan Raheem Sterling-a'n minute 29-naah goal hmahruai a khung a, minute 69-naah English winger Sterling-a cross ball-ah Cherries defender Tyrone Mings-a'n an lamah a tilut. Sterling goal hma­hruai siam saktu Leroy Sane-a'n hun tawp dawn hnaiah crossbar a tih per a, City goalkeeper Willy Caballero-a'n Irish midfielder Harry Arter ball pet a dan bawk avangin goal dang a luh belh tawh lo.

Aguero chungchang bawk

Sergio Aguero chu bench aṭang­in inkhel bul a ṭan a, Brazilian for­ward Gabriel Jesus inhliam vang chauhin minute 14-na aṭangin khel­mual a rap. Argentine forward hi tun hnaiah a tlahniam tih a lang a, coach Guardiola erawhin a chhan thung.

City boss Guardiola chuan, "Theihtawp a chhuah a, goal a khung avangin inrintawkna a neih phah. Inkhelh hma leh inkhelh zawhah a pawimawh dan a ngai reng," tiin inkhelh banah a sawi. Spanish manager hian Argentine forward hi goal khungah a ngai a, a nihna takah chuan Aguero tihbuai avanga Cherries defender Tyrone Mings-a'n an lama a tih luh a ni.

Goal an chhuah lo

January 21 khan Manchester City leh Tottenham Hotspurs te 2-2 in an inhnehtawk. Spurs keeper Hugo Lloris vawi hnih chesual aiin goal hnih chhuah ve tho City keeper Claudio Bravo-a'n rin zui a hlawh lo.

Pep-a'n Willy Caballero chung­ah rinna a nghat a, Argentine veteran keeper ven hnuah a zawnin vawi li an chak tawh a, vawi thum an clean sheet. Cherries an hneh ṭum hian Everton 0-4 a an hneh loh ṭuma mual­pho John Stones a khel ṭha bawk a, squad nei chhah City tan champion kawng a inhawng zau phah sawt.

Eng nge an sawi?

Bournemouth boss Eddie Howe chuan, "City kha khualmual khel an ni nachungin game an thunun thei a, chu chuan an ṭhat zia a nemnghet a ni. Ka naute an theihna zawng zawngin an khel a, kha aia ṭha chu ka beisei lo," tiin team ṭha zawk laka chak lo an nih thu a sawi.

Manchester City boss Pep Guardiola chuan, "Kan khel ṭha tak zet a, kan chang danah ka lungawi hle a ni. Hun tawp minute 10-15 phei kha chu kan khel ṭha lehzual a, vawi tam tak ball kan inpe kual a, goal erawh kan khung belh lo a, kha erawh a ngaihdam theih," tiin an khelh danah a lungawi hle.

Hmabak

Inrinni hian Manchester City-in FA Cup fifth round-ah Cham­pionship club Huddersfield an hmachhawn dawn a, Pep Guardiola-a'n February 22-a Champions League-a Monaco an hmachhawn dan tur milin player a rem ngam ang. February 26-a khelh tur Manchester Derby chu Manchester United-in EFL Cup final an khelh dawn avangin sawn a ni a, City-in hahdamna hun ṭha an neih phah bawk.

Guardiola hote hian point 52 hmuin Liverpool laka chesual Tottenham Hotspurs an lehpel a, pahnihnaah an awm tawh. Season ṭan hmaa champion tura rinkai City hi Chelsea tan awm tinuam lo tham an ni.