Real Madrid mikhual tur Napoli
Europe club ṭha zualte inelna Champions League nomawi kawl hnem ber Real Madrid chuan zanin dar 1:15 hian Santiago Bernabeu-ah Napoli an lo mikhual dawn.
Vawi 11 champion tawh Real Madrid leh Napoli te hi 1987-88 Champions League first round-ah an lo inhmachhawn tawh a, Real hian an khelmualah 2-0 a hnehna an chan hnuin Italy-ah erawh 1-1 in an inhnehtawk thung, khatih laia Napoli thiampuipa chu Diego Maradona a ni.
Real Madrid director Emilio Butragueuo chuan, "Kan khelmualah kan inkhel hmasa dawn a, result ṭha kan neih a pawimawh ang. Kum 1987 kha kan ngaihtuah let chuan Napoli lamah Maradona a awm a, an khelmuala va inkhelh kha a harsa takzet a ni," tiin thawnthu hlui awmze nei a sawi chhuak.
Napoli tana Serie A nomawi chawi tawh Maradona chuan, "Real Madrid hian player langsar tak tak an kawl khawm avangin hnehna chang tura rinkai zawk an ni mai thei. Mahse, tunlai boruak kan thlir chuan Napoli hian hnehna chang turin theihna an nei," tiin a lo sawi ve bawk.
Napoli hian Argentina legend Maradona an kawl tawh lo a, season hmasa Serie A match 35 khelh aṭanga goal 36 khung thei Gonzalo Higuain chu Juventus lakah an chan bawk.
Mahse, Maurizio Sarri naute hi Real Madrid tan zuam sual theih tur an ni. Higuain thlaktu Arkadiusz Milik-a'n a club thar tan match kua a khelh aṭangin goal sarih a khung nghal.
Amaherawhchu, Ajax striker hlui hi nikum October aṭang khan hliam vangin a khel thei lo - Milik aia an chhawr tak Dries Mertens-a'n inelna hrang hranga inkhel bul a ṭan vawi 15 aṭanga goal 15 a khung theih avangin Napoli hi an hlauhawmna a nep chuang lo.
Napoli hian an league match hnuhnung pathumah goal 10 khungin an lamah goal hnih chiah a lut a, inelna hrang hranga an match hnuhnung 18-ah chak loh an neih loh avangin Real hna hi a awlsam lo ang.
Zinedine Zidane-a kaihhruaina hnuaiah Real Madrid hian Barcelona leh Atletico Madrid te ban phak lohin La Liga hmahruaitu an ni mek a, vawi 11 an champion tawhna Champions League nomawi a zawna champion thei hmasa ber ni turin Spanish club lian hi an inringtawk.
Real Madrid thiampuipa Cristiano Ronaldo chuan Thawhṭanni khan team training a zawm lo! Portugal captain hian hliam a neih hriat a ni lo a, defender Fabio Coentrao nen gym lamah hun an hman theih avangin Napoli a hmachhawn thei tura ngaih a ni.
Nikum November thlaa kerek hliam Gareth Bale-a'n a ṭhiante zingah training nei ve tawh mah se inkhel bul a la ṭan a rinawm loh. Manager Zidane chuan Weles international hi second leg February 22-a an khelh hunah chuan chawr theih a nih tawh a beisei thu a sawi.
Kum 2005 March thla khan Real hian an khelmualah Schalke an hneh lo a, hemi hnu hian Santiago Bernabeu-ah Champions League match 11 an khel leh tawh a, chak loh an nei lo - vawi kua hnehna changin ṭum hnih dang an khingpuite nen an inhnehtawk.