Bayern buzawlah Arsenal

Season ruk chhung a zawnin Champions League last 16 aṭangin Arsenal an tla tawh a, tun season-ah pawh an hmaa ding tur chu Bayern Munich an ni. Gunners tana fiahna hmasa chu zanin dar 1:15 hian Allianz Arena-ah a inṭan ang.

Arsene Wenger-a'n Pre­mier League-a Hull City an hmachhawn dawn ṭumin Champions League khel tura inbuatsaihna ṭha ber chu 'hnehna chan a ni,' a ti a, Gunners hian Alexis Sanchez goal hnih hmangin Hull 2-0 in an hneh.

Bayern Munich pawhin hun tawp dawna Arturo Vidal leh Arjen Robben te goal hmangin Ingolstadt 2-0 in an hneh a, kartawp inkhel bikah Carlo Ancelotti naute chiah hi Bundesliga table chung lam team paruk zinga hnehna chang thei an ni.

Group A hmahruaitu an nih hnuah Arsenal manager Arsene Wenger chuan group ṭhenkhatah chuan pakhatna aiin pahnihna an ṭhat zawk thu a sawi lawk. Gunners hi Bayern Munich nen pawh fuh an ni zui a, kum 2005, 2013 leh 2014 khan Champions League last 16-ah an hneh tawh loh avangin German club hmachhawn hi an ṭawng­­ṭai chhanna a ni lo tawp ang. Bayern hi Group D-ah pa­hnih­na an ni a, Spanish club Atle­tico Madrid hnuaiah an awm.

Ozil harh rawh!

Germany captain hlui Mi­chael Ballack chuan, "Nomawi lian tham chawi i duh a nih chuan Arsenal chhuahsainin Bayern Munich zawm rawh," tiin Mesut Ozil hnenah thurawn a pe! Arsenal hian Germany tana khel phak Ozil bakah defender Shkodran Mustafi an nei a, Per Mertesacker erawh hliam vangin a la inkhel thei dawn lo.

Arsenal hian nomawi chawi an duh avangin sum tam tak sengin Ozil hi Real Madrid aṭangin an lalut, pound maktaduai 42 man German midfielder hian FA Cup pahnih a chawipui tawh. Gunners player manto ber hian hmabak a la nei a, chumi tihlawh­tling tur chuan an ram club lakah a thiamna a lantir a ṭul a ni.

Kum 28-a upa Ozil hian tun season-ah league match bikah goal nga a khung tawh a, assists vawi li a nei tawh bawk - a goal khung hnuhnung ber erawh nikum December thlaa Stoke City an hneh ṭum daih tawh kha a ni. Ozil hian group stage-a Ludogorets an hneh ṭumin hattrick a siam a, Champions League khelh mekah goal li khung tawhin Arsenal tana goal khung hnem ber a ni mek.

Wenger chuan,"Goal a khung leh a hun tawh, hun ṭha a neih a la chhawr ṭangkai thei rih lo mai a ni. Ka hmuh dan chuan inrintawkna a hloh deuh a, Hull laka a hlah ang kha chu tun hmain a hlah ngai lo," tiin a playmaker chungchang a sawi.

Arsenal tan tlarhnung laiah Mustafi leh Laurent Koscielny te an inkawp leh ngeiin a rinawm a, Chelsea an hmachhawn ṭuma hliam tuar Hector Bellerin a dam ṭha tawh bawk. Premier League top scorer nilai Sanchez (17goals) chu tlarhmaah a awm leh ang - Aaron Ramsey leh Santi Cazorla te hliam vanga an chawlh avangin midfield lai hi Wenger tana remkhawm harsa lai tur chu a ni.

Bayern an nghet

Jupp Heynckes-a'n treble champion a nihpui hnuah Bayern a chhuahsan a, Pep Guardiola enkawlna hnuaiah a zawnin Bundesliga nomawi vawi thum an chawi zui leh bawk. Spanish manager Pep hnuaiah erawh Champions League semifinal lut vek mah se final thleng loin an tawp.

Carlo Ancelotti kaihhruaina hnuaiah Bayern Munich hi tun hma angin an kal filawr rih lo, chutihrualin league-ah point sarihin hma an hruai fal. Champions League match 10 an khelh pui tawha vawi thum chiah an ngam loh Gunners paltlang hi an huphurh hran lo ang.

Bayern Munich winger Arjen Robben erawh a la ṭawng fimkhur hle. Dutch international chuan, "Arsenal nen kan inkhel leh dawn. Team dang kan la hmachhawn ngai loh nen kan intawn ve tawh a rinawm tehlul nen, ṭum dang zawng aiin kumin chu a hautak ang tih ka ring," a ti.

Kum 33-a upa Robben chuan sawi chhunzawmin, "Kan intawn tawhnaah khan a tawpah a lawm zawkah kan ṭang ziah a, mah se hei erawh kan hriatreng a ṭul. Hnehna kan lo chan tawhna avang khan kuminah hian kan tlang dawn tihna a ni lo, quar­terfinal lut tur chuan kan chak leh phawt a ngai," tiin a sawi.

Chile international Vidal pawhin an mikhual tur lo chhaihin, "Germany-ah chuan Bayern hmachhawn apiang hian an goal venhim hi an thupui a ni ṭhin. Arsenal erawh goal khung tuma nawr chi an ni. England-a an khelh ṭhin dan phung thoin Munich-ah pawh an khelh ka beisei," tiin attacking game an khelh a beisei thu a lo sawi.

Germany-ah thlasik chawlh an hman rei avangin Bayern hian kuminah match nga chiah an la khel a, chak loh an nei lo. Schalke nen an inhnehtawk tih loh chu hnehna an chang vek a, league match li bakah German Cup last 16 khelin Wolfsburg an hneh. Italian manager enkawl Bayern hneh tur chuan Arsenal tan thil mak tih a ngai ang.