Hma hun sawi duh lo Ibrahimovic

Manchester United striker Zlatan Ibrahimovic chuan season tawpah Manchester United-a a cham chhunzawm zel dawn leh dawn loh a hriat loh thu a sawi a, hetihrual hian Old Trafford a pan hmaa kum khat dang contract hlawh chhuak tura hmachhawp an pekte chu a hlenchhuah tawh thu a sawi bawk.

Kum 35-a upa striker hian nipui transfer bazar lai khan Manchester United hi free transfer-in a zawm a, kum khat chhung atan contract ziakin tun season-ah goal 20 a khung tling der tawh. United manager Jose Mourinho chuan an club top scorer ni mek hi season tharah an hnena ala cham a beisei thu a sawi tawh a ni.

Swede striker ropui chuan, "Ka hmalam hun tichiang tur chuan kan la nghah phawt a ngai rih a ni," a ti a, tun dinhmunah chuan champion nomawi a ngai pawimawh ber. Ibra chuan, "Com­munity Shield nomawi kan nei tawh a, nomawi dang tan hmun a la awm. Premier League-ah kan champion lo a nih pawn Europa League leh FA Cup-ah beisei kan la nei a ni," tiin champion nomawi chawi a tum ruh hle. United hian EFL Cup final an lut tawh bawk.