Chelsea an vannei chiah em?

Season hmasa an chet chhiat vangin Chelsea-in tun season-ah Champions League leh Europa League an khel phak lo a, an elpui club dangte inkhelh laiin hahchawlhna hun an neih theih phah.

Antonio Conte kaihhruaina hnuaiah Chelsea hi Premier League-ah an par vul mek a, league match 25 an khelh tawhah point 60 hmuin hma­hruaitu an ni. Pahnihna Man­chester City nena an inthlauhna chu point riat a ni a, an hnuaiah Tottenham leh Arsenal te an la awm bawk.

League champion nih tum zingah Man City, Arsenal leh Tottenham te hian Champions League an khel vek a, Spurs hian group stage an paltlang zawh loh avangin Europa League an khel zui dawn. Gunners leh City te erawhin group stage-a match ruk an khelh zawh tawh hnuah last 16 an khel leh dawn.

Europe-a inlan leh inlan loh chungchangah Blues keeper Thibaut Courtois chuan, "Kawng ṭhenkhatah chuan a ṭha zawk ngei mai a, chutihrualin a ṭhat lohna pawh a awm ve tho. Season dangah chuan league champion niin Europe-ah kan inlan ṭhin a, tun dinhmunah chuan Champions League kan khelh leh khelh loh hian danglamna a siam tam lutuk pawh ka hre lo," tiin a sawi.

Tun dinhmuna Premier League table-a a sang paruk zingah Chelsea (30 match) hian inelna hrang hrangah match an khel tlem ber a, Europa League lamah inlan Manchester United (39) chu khel hnem ber an ni - Arsenal (36), City (37) leh Liverpool (34) ten Blues aiin an khel tam vek.

Tottenham, Arsenal, Man City leh Manchester United te hian round sang zawk an lut zel a nih chuan match khelh tur an ngah zual dawn a, Chelsea hian FA Cup nena chhiar pawhin a tam berah tun season chhungin match 18 bak khelh tur an nei tawh lo.

Club dang aia an inkhelh tlem chu league lamah an ṭhatpui tia sawi tute chhang zuiin, Belgium international chuan, "Kan squad-ah player ṭha tam tak an awm a, inkhel pakhatah inlan vek theih a ni lo. Player ṭhenkhat chuan bench lamah an hun tam zawk an hmang a, a ṭhen chu squad-ah an hming a lang lo. Inkhelh tur kan ngah a nih chuan midangin khelmualah hun tam zawk an hmang thei dawn tihna a ni mai," tiin a sawi.

Season hmasa Premier League champion Leicester City chuan an club chanchina a vawi khat nan Champions League an khel a, last 16 an lut. Foxes hi Europe-ah cheṭha viau mah se league lamah erawh relegete hlauhthawnawmah an ding mek thung. Claudio Ranieri naute aṭang hian Eu­rope-a inkhelh hautak zia a chiang a, chutihrualin Italian manager Conte hnuaia Blues khelh dan erawh club dangte tana tluk loh tur an ni rih thung.